New Delhi-a kal minister Prof. Lalnilawma chuan a department chan kaihhnawihah Thawhlehni khan Union Agriculture & Farmer’s Welfare leh Rural Development minister Shivraj Singh Chouhan leh Union Jal Shakti minister CR Patil te a kawm a. Union minister pahnihte hi anmahni puitu minister of state leh official-ten an tawiawm.
Union Agriculture & Farmer’s Welfare ministry hotute hnenah hian Mizoram thlai thar hralhna tha zawk a awm theihnan hma lakpui turin a ngen a. Puih an inhuam thu an lo hrilh. Man man zawka thlai thar hralh a nih theihnan a sawngbawl kawngah entrepreneur-te tan tanpuina a awm theih thu an lo hrilh bawk.
Mizoram tan Centre of Excellence for Mushroom ruahmanna tur a thlen a. Shitake Mushroom leh a dangte thar chhuah leh ram pawna thawn kawngah nasa takin a puih tur thu a sawi. Union minister chuan an thil thlen tih hlawhtlin nan tanpui a inhuam thu a sawi.
Ministry of Jal Shakti changtu Union minister hnenah hian Cyclone Remal-in Mizorama tui pump khawl a tihchhiat thu leh harsatna hrang hrang thleng chu ministry-ah thehluh a ni tawh tih a sawi a. Mizorama ruahtui khawlna kalpui dan tur leh tlang kar remchang laia tui khuah siam a pawimawh thu a thlen. Heng rawtna tihlawhtling tur hian, zirchian hnu ah a tul anga bawhzui a nih tur thu Union miniter hian a sawi a ni.
Small Farmers’ Agri-Business Consortium chairman -cum- managing director office pawh Prof. Lalnilawma hian tlawhin, Honey Project an thehluh thu a hrilh a ni.
Minister Prof. Lalnilawma thu thlen dang:
8 Farm connectivity – Tuna Mizoramin a mamawh ber pakhat, huan/zau inkalpawhna kawng siam a nih theih nan tanpuina an mamawh thu a sawi chu Union minister chian ‘farm connectivity’ bik atan kum tharah scheme siam a nih theih nan ruahmanna duan a tul tih a sawi.
8 Saitual district tan Krishi Vigyan Kendra dinsak tura Saitual DC-in dilna a thehluh bawhzui a ni a. Ram pumah KVK thar 121 din tura ruahman mekah Mizorama district thar pathum telh an ni. He ruahmanna hi Expenditure Finance Committee pawmpui tura thehluh a ni anga, hun reiloteah a dinhmun hriat beisei a ni.
8 Rural Development department hnuaia, MGNREGA – Cluster Facilitation Project hnuaia hnathawkte hlawh tur cheng vaibelchhe 2.47 dawn a la nih loh thu thlenin, rang taka pek chhuah a nih theih nan a tul anga bawhzui nghal a nih tur thu an lo hrilh.