ZPM kaihhruai sawrkarin thlai thar lei nana a dah cheng vaibelchhe 110 hmangin mangang taka awm mek hmunphiah chingtute hmunphiah lei sak thuai turin an phut tih MNF chuan an sawi.
MNF Gen. Hqrs. chuan, sawrkar kalta in kuthnathawktute tan tia SEDP-a cheng vaibelchhe 150 a dah chu ZPM sawrkarin pawtpengin, thlai thar lei nan tiin vbch. 110 an dah a, vbch. 40 chu health care atan an dah tih a sawi. Tuna kuthnathawktute thawh rah hralh tur awm chho mek zingah hmunphiah hralh tur tam tak awmin, a chingtuten an duh anga hralhna hreloin an hawihai mek tih a sawi.
ZPM sawrkar chu thlai thar lei nana cheng vbch. 110 an dah hmang duh loin, hmunphiah lei tur hian RR Associate a inremsiam pui a, beisei ang an thlenpui loh hnuah society-te phungbawmah sawmin kawng kual zawk an dap leh mek tih MNF hian a sawi. ‘Vawiin thlengin hmunphiah chingtute chuan an hmunphiah hralhchhuah hun tawh em em, chhe mai thei dinhmuna ding chu hralhna hmu mumal loin hrehawm ti takin hun an hmang a. ZPM hian inthlan dawna mipui hmaa an inzawrh ang ngei khan hmunphiah hi lei thuai turin MNF chuan a phut a. An inzawrh anga a rang thei ang bera khawsa turin a hriattir a ni,’ a ti.
Sawrkar kal tawhte a chhe thei ang bera chhuah a, kuthnathawktute hmangaih ber anga insawiah ZPM chu puhin, hmunphiah hralh hun tha ralhma ngeiin a chingtute harsatna phuhruk thuai turin ZPM sawrkar an phut thu a sawi. ‘Tawngka chauha kuthnathawktute duhsak loin, thlai thar lei nana an sum dah vbch.110 hmang hian hmunphiah hi lei thuai turin kan phut a ni,’ thuchhuah chuan a ti.
Thlai thar leinana sum dahin hmunphiah lei thuai phut sak
