India hmarchhaka service airline-ten an duh ang anga a chuan man an tisang thin chu enpui a, khuahkhirh deuh turin Mizoram MP C Lalrosanga chuan DoNER leh Civil Aviation ministry a ngen.
New Delhi-a Parliament House Annexe-a Development of North Eastern Region (DoNER) ministry Consultative Committee thutkhawmah Lok Sabha member C Lalrosanga hian Mizoram leh hmarchhak state thenkhata thlawhna chuan man to lutuk sawichhuakin, airline-ten an duh ang anga thlawhna chuan man an tito vak vak chu khualzinte tan phurrit nasa tak a tling tih a sawi. Aizawl leh Delhi inkar thlawhna chuan man phei chu a sang tawh hle a. Airlines ho chu awmze neia thlawhna chuan man bituk tir tur leh thunun turin Civil Aviation ministry hotute a ngen.
DoNER minister G Kishan Reddy chuan Mizoram MP ngaihmawh chu tawmpuiin, hmarchhak bial tan bik thlawhna chuan man tih tlem tir dan ngaihtuah turin thutkhawma tel Civil Aviation hotute a hrilh a. MP hian Lengpui Airport runway siamthat chungchangah re-carpetting tihna tura senso tul tum turin DoNER ministry hotute a ngen bawk.
Mizorama rel kawng siambelh chungchangah MP chuan Sairang atanga Lawngtlai district Hmawngbuchhuah thleng rel kawng siamna tur, final location survey lak a ni dawn ta chu lawmawm a tih thu a sawi a. Bawhzui chak turin Railways thuneitute a ngen. Bairabi leh Sairang inkar rel kawng siam hna pawh chak taka thawh zel a tul tih a sawi a ni. Railways hotute chuan Sairang thleng tur rel kawng hi nakum October-a zawh hman an tum thu thutkhawmah hian an sawi.
Mizorama national highways siam mekah kum khat chhunga hnathawh theih hun hrethiam leh chhut chunga kawngpui sialnaa lei laih leh paih hna thawh a tul tih C Lalrosanga hian a sawi a. Fur ruahtui tlain kawngpui siam hna a tih khaihlak leh tih chhiat thin dan hre chunga hna thawk thiam turin Ministry of Road Transport & Highways hnuaia thawk company leh contractor-te hriattir turin DoNER hotute a ngen a ni.
Thutkhawmah hian minister of state BL Verma pawh a tel a. Hmarchhak biala DoNER Consultative Committee member – MP ho bakah DoNER secretary Chanchal Kumar, NEC secretary K Moses Chalai leh ministry hrang hrang hotute an tel a ni.
Thlawhna chuan man khuahkhirh turin MP-in ministry hotute ngen
