Thlawhna khalh laiin boral
Turkish Airlines pilot pakhat chu a thlawhna khalh mek laiin a boral tih airline thuneitute chuan an sawi.
Nilaini khan Turkish airlines thuneitute chuan US ram chhunga an thlawh laiin an pilot chu nikhawhrelova a awm thu an sawi a, New York airport ah hmanhmawh taka tum dilin, an tum fel meuh chuan a nunna an chhan hman tawh lo an ti.
He thlawhna hi Airbus A350 niin, thawhlehni tlai khan Istanbul chhuahsanin US a pan a, Seattle atanga Turkey lam a pan leh laiin he thil hi thleng a ni.
Airline thupuangtu Yahya Ustun chuan, “Airbus A350 flight TK204 thlawhna Seattle atanga Istanbul rawn pan mek chu boruaka an awm laiin pilot chuan a nunna a chan a, a pawi kan ti hle,” a ti.
Pilot a buai tantirh hian thlawhna chhunga medical lam thiamte chuan theihtawp chhuahin a nunna chhan an tum a, thawktute zawng zawng pawh buaiin, hmanhmawh takin New York airport-ah tum an dil bawk. An tum fel hnua pilot dinhmun an enfiah chuan boruaka an awm lai khan a nunna a lo tawp hman daih tawh niin, Ustun chuan a sawi.
He pilot hi kum 59 mi niin, kum 2007 atang khan Turkish Airlines ah hian thlawhna a khalh tan tawh a, thlawhna khalh tur leh khalh laia thil thleng chungchangah pawh engkim zir zo vek tawh niin, hrisel lohna a neih thu engmah report an dawn loh thu thuneitute chuan an sawi a, a chhungte leh a thawhpuite zawng zawng an tawrhpui thu leh, thil thleng chuan a thawn tak zet thu an sawi bawk a ni.
Thlawhna khalh laiin boral
