Thli leh nizung hmanga power siam tamah India pathumna

Thli leh nizung hmanga power siam tamah India pathumna
India chu kum 2024 chhung khan khawvela thli leh nizung chakna hmanga electricity siam chhuak tam ber pathumna a ni a, Germany a luahlan niin Thawhlehnia report thar tihchhuahah tar lan a ni.
Khawvel huapa energy think tank lian, Ember’s Global Electricity Review tihchhuahah hian thli leh nizung hmanga khawvel puma electricity siam chhuah chu a hma kum aiin 15%-in a tam zawk a, India-in heng zinga 10% a thawh.
Report-ah hian carbon tichhuak tlem chi, hman nawn theih hmanga power siam leh nuclear power siam chhuah chu khawvel puma electricity siam chhuah atangin 40.9% a tling a. Kum 1940 chho hnu lamah 40% a kai leh hmasak ber a ni.
India-in nikuma a siam chhuah zingah boruak tichhe lo hmanga siam chu 22% atling a. Hydropower hmangin 8% siamin thli leh nizung hmanga a siam 10% a tling.
Khawvel pumah hman nawn theih thil hmanga electricity thianghlim zawk siam a pung nasa a, kum 2024-ah khan 858 terawatt hour (TWh) siam chhuah niin a hmaa a tam ber kum, 2022 aiin 49% laiin a tam zawk.
Nizung chakna hmanga siam chu kum thum a zawnin electricity siamna atana hmanpui ber a ni ta a, kum 2024 chhung khan 474 TWh siam a ni a. Kum 20 chhung a zawnin power siamna atana hman nasat ber a nihna a ni ta.
Kum thum lek chhungin khawvel puma nizung chakna hmanga power siam chhuah hi 6.9%-in a thang a ni.
India-ah pawh nizung atanga siam hi a pung chak hle a. Nikuma electricity siam chhuah zinga 7% chu nizung chakna a ni a, kum 2021-a siam let a ni tawh.
India-ah hian kum 2024 khan 24 gigawatt (GW) siam chhuah a ni a, a hma kum let aiin a tam zawk a, China leh US chiah nizung atanga power siam chhuah tamah a phak lo.
“Nizung atanga siam power hi thil inthlak mekah khawvel puma energy siamna hnar ber a ni tan mek,” tiin Ember’s Managing Director Phil MacDonald chuan a sawi a. “Battery hmanga dah khawl chuan a chakna hi dan theih a ni lo. A thang chak a, kan electricity hnar ber a ni ta a, khawvelin electricity a mamawh pawh a phuhru thei dawn a ni,” a ti.
Ember’s Asia Programme Director Aditya Lolla chuan Asia-ah energy thianghlimin hmun a chang lian mek zel a, nizung chakna leh hman nawn theih thil hmanga siam a pung zel tih a sawi.
Sik leh sa inthlak zel karah India hian Nationally Determined Contributions (NDCs) siamin kum 2022 khan UNFCCC-ah a thehlut a, kum 2030-ah chuan power a siam chhuah zahve chu non-fossil fuel an tih ni hmanga siam chhuah a tum a ni.
Kum 2021 khan kum 2030-ah chuan non-fossil fuel hmanga power a siam chhuah chu 500 GW tlin a tum tih a lo sawi tawh bawk.