Thli leh rialin in 200 chuang a tichhe leh

May 2 tlaia thli, ruah leh rial thawk chuan Mizorama district pathumah in 200 chuang a tichhe leh a, mimal in bakah sawrkar quarters deuh vek a ni.
Lawngtlai district chu in chhia tam ber ni mah se, a tam zawk chu thawmthata luahzui leh theih a ni thung. In chhia zawng zawng hi hriat theih chinah 99 a ni a, Tuithumhnarah 69, Lunghaukaah in 8, Sabualtlangah 1, Vathuampuiah Bangladesh raltlan chenna in 21 a chhia a ni.
Khawzawl district-a Sialhawkah in 71 vel a chhia a, heng zinga in thum chu ruah sur nasa in leimin leh lungrem a tih min vang a ni a, in 5 chu luah zui ngam loin a luahtute an inthhiar chhuak bawk. A bak 68 chu rialin an inchung a tihchhiat a ni.
Serchhip district-a Thenzawlah thli leh ruah thawk vangin in 28 a chhia a, heng zinga 6 chu luah zui tlak loha chhia a ni. Sawrkar quarters chhia a awm nual bakah thli thawk hian electric ban leh hrui a tichhia a, Thenzawl khaw pum deuh thawhah power supply a awm loa, P&E department chuan Zirtawpni khan a siamthat hna a thawk nghal.
Serchhip district-a Vanchengte ah in chhia report 16 a ni a. Thingliana chhe zat hi hriat chian a la ni lo. Serchhip khawpui chhunga P&E Veng leh Vengchungah in chhia an awm bawk.
Saitual district-a Suangpuilawnah chenna in 7 a tichhia a. Lunglei district-a Lungsen PHC building la hawn loh pawh ruahsur nasa avangin ceiling a chim a, room thenkhatah tui a tling nasa tih thu dawn a ni.
Heng hmunah te hian khawtlang hruaitute ruahmanin in chhia senghawi leh chhawmdawl hna thawh a ni hlawm a, district thuneitute atangin chhawmdawlna sumfai leh thil tul dangte ngaihtuah pui an ni.