Tunhnai ni hnih thum chhung vela Mizorama hmun thenkhata thli, rial leh ruah thawkah in tihchhiat a nei leh nual a, Saitual leh Mamit district bika chhia hi in 150 vel a ni.
Saitual district huamchhunga thli leh rialin in leh lo leh bungrua a tihchhiat chu district bawrhsap Dr Lalngura Tlau chuan a hmuna enfiah tura tih angin enfiah a ni a. DM&R department atanga tanpuina pek chhuah theih dan tur ngaihtuah pui nghal an ni.
Maite, Mualpheng, Tawizo leh a chhehvel khaw dangte ah a chhe nasa zual a. Chenna in luah zui tlak loh khawpa chhia chu an awm lo nia hriat a ni a; a tlangpuiin thawmthat ngai (partially damaged) a ni hlawm. Tanpui ngai nia chhinchhiah hi Maite ah chhungkaw 36, Tawizoah chhungkaw 86 leh Mualphengah chhungkaw 6 an ni a, tanpuina dawng thei an ni em tih enfiah ngai dang an awm bawk.
Heng chhinchiah tak te hi an banck account details lakkhawma thehluh kim anih veleh DM&R-in dan a neihsa angin an account-ah tanpuina thunsak tur a ni.
Pathianni tlai thimhlima thli thawk leh rial tla chuan Mamit district chhung khaw thenkhatah chhiatna a thlen nual a. Rialin Dampuiah in 10, Bunghmun West ah 10 leh Tuidamah in 9 a den chhiat bakah thli tlehin Bunghmun West-ah chenna in 1, Tuirumah chenna in 1 leh Mamit Luangpawlah motor workshop a len chhe bawk.
Chhiatna tuarte hi Mamit DC office leh BDO atangin silpauline sem nghal an nih bakah chhawmdawlna awm thei ang ang buaipui sak an ni.
Thli leh rialin in Saitual leh Mamitah in 150 vel tichhia
