Tunhnaia thli leh ruah thawk bakah hmun thenkhata rial tla in thil tihchhiat hrang hrang a neih zingah Champhai district Tlangsama polling station tura ruahman pahnih a tel a, hman zui tlaka chak taka siam a nih theih dan tur enpuiin Nilaini khan district election officer James Lalrinchhana chuan a tlawh.
DEO chuan tunhnaia thli leh ruah na taka thawkin Tlangsam-II Polling Station-ah chhiatna a thlen chu pawi a tih thu sawiin, thuneitu sang zawk hnenah pawh thlen nghalin, a tul angte chak taka buaipui a ni tih a sawi a. Mamawhna a san tawh avanga hun reilote chhunga peihfel a ni mai tur chu lawmawm a tih thu a sawi. Tun aia changtlung zawka Tlangsam-I leh Tlangsam-II PS-te siam a nih theih nan hma lak a nih tur thu a sawi bawk.
Thli leh ruah na taka thawkin Tlangsam-II PS atana hman Govt. Tlangsam Middle School bang a tih chim leh a chung thliin a lakte enfiah niin, School Education department kaltlanga school luh hma ngeia zawhfel hman tuma thawmthat hna kalpui mek a ni a. Tun atana hmalakna chu a tha rih nia hriat niin, nakin hun thlirin changtlung zawka chei dan tur enfiaha sawiho a ni. Heng bakah hian he school hmun thoa awm Tlangsam-I PS pawh enfiah niin, lei che avanga a chhuat khi leh tlahniam chu a rang lama hnawhphuia siamrem ngai nia hriat a ni a; hma lak thuai dan tur ruahman a ni.
Heng bakah hian polling station atana tul hrang hrang leh awm ngei tura bituk, Assured Minimum Facilities (AMF) hnuaia ngaipawimawh, polling station kalpawhna kawng, tui in tur, power supply, inbiakpawhna signal, wheelchair luhna ramp, toilet, vote thlaktute intlarna leh luh chhuahna, bungraw mamawh bakah polling station hmunhma enfiah a ni.
Thli nuai chhiat zingah polling station atana ruahman a tel ve
