Hmasawnna tluantling a awm theihnan village council-te an pawimawh a, thliarbik nei loin VC thawk thate thuam chak zel an ni dawn tih Rural Development & Administration minister Prof Lalnilawma chuan a sawi.
Rashtriya Gram Swaraj Abhiyan (RGSA) hnuaiah Siaha district-a village council 7 hnenah Thawhlehni khan minister hian computer set a hlan a. Langtlang leh tangkai taka hman a nih theihnan a hmun ngeia kalchilhin computer hi sem a ni tih a sawi.
Sawrkarin online connectivity a ngaipawimawh a, tuna computer sem hi a tangkaina hmang chhuak thei turin inthuamchak a ngai a, khawvel hmasawnna umpha zel tura mahni thiamna tahhriam zel a ngai tih a sawi.
“Thliarbik nei loin VC thawk thate thuam chak zel an ni dawn a, district hmasawnna turin mitin thawhho a tul,” Prof Lalnilawma hian a ti a. Hmasawnna tluantling a awm theihnan VC-te an pawimawh a, grassroot level-a institution pawimawh ber an nih angin theihtawp chhuah turin a chah. Sawrkar atanga engkim beisei loa, mahni sum hnar (own source revenue) nei theia hma la zel turin a fuih bawk.
RD&AD director Dr Lalngura Tlau chuan RGSA component hrang hrang leh an hnathawh tlangpui a sawifiah a. RGSA hnuaiah computer sem chu a peng (component) pakhat chauh a ni, tiin, Panchayat Bhavan (VC House ) sak, VC-te tana capacity building neihpui, VC-te chakna ti pung a, ram leh hnam tana an thawhnaah an theihna thuamchak chu RGSA thil tum a ni tih a sawi.
Rashtriya Gram Swaraj Abhiyan hi centrally sponsored scheme, Ministry of Panchayati Raj hnuai ami a ni a, ram pum huap khawtlang inrelbawlna tihchakna tura hmalakna a ni.
Thliarbik nei loin VC thawk thate thuam chak zel dawn – RD&A minister
