‘Thliarkar rilru’ hi hmasawnna daltu
– Lalduhoma
Khua leh bveng bil lutuka thil kalpui tum chu hmasawnna daltu a ni thin tih chief minister Lalduhoma chuan sawiin, ‘thliarkar rilru’ chu harsatna min thlentu a ni tih a sawi.
New Serchhip chuan Ningani an kum 50 tlin, Golden Jubilee an lawm a. Serchhip bialtu MLA ni bawk Lalduhoma hian hmanpuiin, khaw tam takin harsatna an tawh chu ;thliarkar rilru’ a ni tih a sawi.
“Veng bil ringawt, thler khat ringawt, veng tepen khat ringawt tana thapui thawha bei duh pawl kan lo awm leh mai thin. Hetianga ‘thliarkar rilru’ zim lutuk neih hi hmasawnna daltu a ni a. Infrastructure pakhat hian khaw tam tak mamawh min pe thei,” a ti.
Kum tela leilung chhiatna a tam tial tial avangin heng chhiatna laka him ngaihtuah chunga in leh lo kan din a ngai tih chief minister hian a sawi a. Khawchhung inkalpawhna kawng pawh ruahman lawk a tul tih a sawi.
Tourism tihhmasawnna kawngah hmunhma a neih that avangin Serchhip leh a chhehvel atanga bul tan an tum a, khualzin hip thei an hmunhma neih te duat a, kan mizia hrim hrim pawh midang hip thei zawnga nun tum a ngai tih a sawi a. Thenzawlah Artui Farm, Vantawng Rope Way, Hmawngawn lui chhuah bulah Mat khuah an tum thu a sawi bawk.
New Serchhipah hian 1974 April atang khan Vanlalsiama leh a nupui V Rosangi chu an fate pathum nen in sain an awm tan a, an luh kum tawp lam hian chhungkaw pakhatin an zawm leh a, kum telin an pung chho ta a ni. 2023-a an inchhiar danin chhungkaw 980 vel, mihring 4500 vel an cheng mek.
‘Thliarkar rilru’ hi hmasawnna daltu – Lalduhoma
