India ram state tam zawk hi chuan engemaw berah intodelhna an nei thim them hlawm a. Hetih lai hian, India hmarchhak state-te hi kan hnufual deuh bik a; NE state zingah rau rau pawh Mizoram hi a hnufual ber kan ni awm e. Hnufual han tih hian, ei leh bar dehchhuah leh sum thawhchhuah (economy) kawnga kan dinhmun sawina a ni. Living standard sâng tak leh fashion sâng lam a kawk lo.
Hnufual rau rauah pawh, thil pakhat tala intodelhna nei ve tura tan kan lak hi a hun tawh hle. A engkim mai state pawn lam atanga chawkluh ngaia kan awm reng mai hi tlawma lak a, tan kan khawh hi a ngai tawh takzet niin a lang.
Mizoram hi ram zim te, mihring pawh tlemte awmna, a ram leilung tha em em bawk si, duhthusama hmasawnna hna thawh theihna ram a ni. Chuti chunga tun thleng maia intodelhna pakhat tal pawh nei lova kan awm reng hi tu mawh nge tiin zawhna siam ila, a tam zawk chuan ‘sawrkar’ kan ti ngeiin a rinawm. Sawrkar tihtur chu ram leh hnam hmasawnna ngaihtuah a ni, kan ti a, a dik e. A nih leh sawrkar chuan engtiang chiahin nge ram leh hnam hmasawnna turin a thawh tih hi mipui lam hian kan vil zui thin em? Kan vil zui lo a, sawrkarin a tihtur a ti bawk si lo a nih chuan, ram ropui kan thleng ngai lovang. Chutiang avanga tun dinhmun ropui lo taka la ding reng hi kan ni, tihna pawh a ni nghal awm e.
Mihring tlemte eikhawp thar chhuak tura thawk kaw thei lo sawrkar lo awm tawh zawng zawng leh, chutiang sawrkar siam thintu mipuite hi, a tu nge dik lo zawk tiin bukna khai ta ila, a inbuktawk vel mai awm e.
Kan intodelh thei chiah lo a nih pawhin, thlurbing pahnih khat tal neih hi tihmakmawh niin a lang. Chung zingah chuan ei bara kan rin pui ber buhfai hi i thlurbing ve ang u. ‘Leilet siamna ram awl hectare sing chuti zat chu kan nei’ ti reng chung sia Vai buhfai lei nana mipui chhiah tlingkhawm hman tlut tlut reng hi a inhmeh lo. Tun tum inthlanpuiah hian eng sawrkar pawh lo ding se, buhfai hi ‘thlurbing’ah nei se a tha khawp ang.
Thlurbing neih…
