ZPM party chuan thudik tawk lo hmanga beih a tawk nasa hle tih ZPM hruaitu, minister K Sapdanga chuan a sawi.
ZPM Thalai Hqrs buatsaiha Inrinnia Aizawla street campaign-ah K Sapdanga chuan, an party-in thudik tawk lo hmanga beih a tawk mawlh mawlh nia sawiin, an MLA Pu TBC Lalvenchhunga chu car rental chungchangah a hmingchhe thei ang bera puh ni mah se, vawiinah chuan Car Rental Association hnen atangin thu an lo hriat dik loh vang a nih thu sawiin ngaihdam dilna thu mawi tak an tichhuak leh ta zawk a, an ni chuan an ngaidam chiang hle tih a sawi.
MP candidate Pu Richard Vanlalhmangaiha pawh, thenkhatin tute emaw mawng hiatin politics ramhlui zia leh thu belhchian dawllo hmang bawka beih a ni a, hei pawh hi nakin lawkah thudik a la rawn langchhuak leh mai dawn tih minister hian a sawi.
“Beih kan tawk nasa em em a, amaherawh chu Pathian leh mipui kan lamah in tang tih kan hriat hian kan thla a muangin min tichak thin. Mizorama party awm mek zingah chuan a thawkrim ber party niin kan inchhal ngam hial a, kan ram tan hmasawnna thar leh kalphung thar chhawp chhuah kan duh vang a ni. Tun MP inthlan turah pawh theihtawp kan chhuah a, thudik lo leh dawt hmanga eptute bei turin kan inzirtir ve ngai lo,” a ti. Ram tana an tih duh leh hmachhawp an sawi uar a, chutiang ti tur chuan theihtawpin an thawk mek tih a sawi a ni.
Thudik lo hmanga beih kan tawk – K Sapdanga
