Forest Conversation (Amendment) Bill 2023 leh Manipur buaina chungchangah Mizoram Rajya Sabha K Vanlalvena chu thudik lo hmanga beiah MNF Thalai chuan ZPM Thalai an puh.
MNF Thalai Hqrs. thuchhuak chuan Forest Conservation (Amendment) Bill 2023 sawihonaah MP Pu K Vanlalvena chu vote thlak ngam lo leh bill duh lohna lantir duh loa tlanchhiaah ZPM Thalai hian an puh a. Hemi hma hian ZPM worker-ten social media-ah Pu K Vanlalvena chu Manipur chungchanga House-a suspension of business notice thehlut lo, mahni thutiama ding lo, tiin thudik loin an lo bei tawh tih a sawi.
Hnam anga tanrual a hun lai leh inthlawp tawn hram hram a tul laiin, ZPM Thalai-in thuchhuah siam meuhin dik lo taka MP an bei duh pawi an tih thu sawiin, ‘FCA Bill sawi ho a nih hma hian Chairman-in Manipur chungchang sawi a rem tih loh avangin opposition MP-te chuan House an chhuahsan vek tawh a. He bill hi tlang ngei tur a ni tawh a, Pu K Vanlalvena chuan he bill, forest thuneihna chhuh thensakna tur bill pass puitu nih a duh loh avangin House hi a chhuahsan ve leh a. He bill a thlawp loh thu leh a thlawp loh chhante ziakin, thuchhuah a siam tawh bawk,’ a ti.
August 7-ah pawh Manipur-a Zofate laka Meitei-ten tharum an thawh chungchang sawihona atana House adjourned dilna Rule 267 chu MP K Vanlalvena hian a thehlut leh tih MNF Thalai hian an sawi.
‘Hetiang hi thil thlen dan leh awmzia a nih lai a, ZPM Thalai leh party worker-ten thudik tluantling lo hmanga rem leh rem loa kan MP Pu K Vanlalvena an bei fo mai hi tun hnuah chuan ching tawh lo turin kan chah a. Kan MP hi MNF MP niloin Mizoram MP a ni tih lo hre bawk turin ZPM Thalai hi kan chah a ni,’ thuchhuah chuan a ti.
Thudik lo hmanga MP beiah MNF Thalaiin ZPM Thalai puh
