Thudik loa puh an nihnaah
enforcement staff lungawi lo
Transport department hnuaia enforcement staff-te chuan an duty-na kawnga thudik lo hmanga puh an ni, tiin an lungawi loh thu an sawi a. Thudik loa puhtu hi ngaihdam dil turin an phut tih an sawi.
Vehicle Enforcement Service Association Mizoram (VESAM) thuchhuak chuan, enforcement staff-te hi Motor Vehicle Act 1988 leh Central Motor Vehicle Rules 1989 kengkawh tura duty thin an ni a. Heng Act leh Rules ang chuan, passenger phur chi lirtheite hian sumdawnna bungrua leh lirthei phurh theih china bituk bak phurh phal a ni lo. Chutiang bawkin, bungraw phur chi lirthei (goods carrying vehicles) hmanga passegner phurh phal a ni lo a ni.
Tunhnaiah social media hrang hrangah maxi cab khalhtu pakhat chuan enforcement duty-ten an lo man chungchang leh pawisa a chawi dan chungchangah thudik tawk lo a thehdarh chiam tih sawiin, ‘Kan hriat theuh angin, maxi cab-te hian passenger-te bungrua (personal belongings) bak an phur thiang loa, sumdawnna bungrua phurhna tur a ni lo. Kha maxi cab pawh kha danin a phal chin bak a phurh avanga man niin, a pawisa chawi (fines) pawh hi receipt mumal taka pek a ni a, sawrkar revenue-ah thehluh vek a ni,’ a ti.
Dawt phuah belh hmanga enforcement duty-te puh an ni chu department pumpui hmingchhiatna a nih avangin VESAM chuan tha lo a ti hle tih a sawi a. Thudik ziktluak lo hmanga social media-a thehdarhtu, maxi cab khalhtu hian a hma thei ang bera ngaihdam dil turin an phut tih VESAM hian a sawi.
Thudik loa puh an nihnaah enforcement staff lungawi lo
