Mizoram Peoples’ Forum hruaitute nen July ni 25-a an inkawm tuma chief minister thusawi sawrkar thuchhuahin a tarlan dan chu, “CBI chu ram dan tharin a phut ang thlapa General Consent pek an nih thu te a lo hrilhfiah..” tih a ni.
Hemi chungchangah hian nimin khan MPCC Vigilance Cell chuan press conference an nei a, “Chief minister-in ram dan tharin a phut a tih hi IPC,1860 thlaktu BNS, 2023 niin a lang a, CBI consent pek chungchangah he dan thar hian engmah phut a nei lo,” an ti.
MPCC Vigilance Cell chuan, Mizoram sawrkarin CBI hnena phalna an pek thar July 1, 2024 Gazette Notification-ah pawh he dan thar hi sawi lan a ni lo a, Notification-ah hian, ‘Mizoram sawrkar hnuaia public servant-te CBI-in an chhui hmain State sawrkar phalna ziaka lak hmasak phawt tur a ni’ tiin tarlan a ni, an ti a. Chief minister chu thudik ziktluak lo hmanga mipui rilru kaihhruai tumah puh in, chu chu bansan turin an ngen a. Mipui ten thudik an hriat theih nan mipui hmaa sawihona neihpuiah ZPM an sawm tih an sawi nghal bawk a ni.
Nimin vek khan PC party president Vanlalruata chuan sawrkarin general consent a pek loh thu a lo sawi ve bawk a. Chief minister leh ram hruaitu thenkhatin CBI te general consent pe anga an insawi reng hi a dik lo a, an party dan hremi ho phei chuan CBI te general consent pek theih a nih loh thu Press Conference hial neiin an sawi a; hetiang thu inkalh ngaihthlak fo hi a ninawm… mahni party legal cell-in consent pek theih loh anga an sawi laia, hruaitu ten consent pe anga insawi bawk si hi thu awmze nei lo a ni… tiin a lo sawi ve bawk.
General Consent pek leh pek loh chungchanga heti taka party hrang hrang bauh rawn hlawh ta luai luai mai chu, a bauhtute hian kawngthlang lama sakei zuangthla lai hi an hmu ngei niin a lang. Hetia press conference hmanga inchhang mai lo deuha mipui hmaa thudik tak hailan hi thil tul tak ni tain a lang a, thudik hriat hi mipui right a ni si a. Thu inchuh a awm tawh chuan, a dik zawk leh a dik lo zawk a awm tihna a ni a, fifty-fifty (50:50) hmanga sawifel theih pawh niin a lang lo.
Thudik ziktluak lo… ?
