MNF chu an thutiam ang tihhlawhtlin loh an ngah a, veng khat pa daw thei leh rinawm lo an sawi ang mai an ni tih ZPM chuan an sawi.
ZPM general secretary Eddie Zosangliana Colney chuan, MNF chu party upa tawh tak, tawnhriat nei tha, inthlan vawi tam paltlang tawh an ni chungin, an che buai em em a, aikaihtu engemaw nei ang maiin an zeng tlat a. 2018 inthlan dawna nasa taka an aupui, an flagship programme SEDP chu chhungkaw 60000 vel hnenah Rs. 25000 den denin inthlan hma kum atangin an pe thei hram a, kawngchhawng leh lei verh, buha intodelh, traffic jam awm lo leh mau chungchangah te an sawi leh thutiam ang an ti lo tih a sawi.
“Mizoten mi rinawm kan tehna pakhat chu thutiama dingnghet te hi a ni thin a, chuti ang zawnga teh dawn chuan, kan sawrkar thlahliam mek hi mahni thutiama ding nghet lo, veng khat pa daw thei leh rinawm lo an sawi ang mai a ni,” a ti.
Hun hmasa lama an lo khawsak tawh danah an hlawhchham chian em avang leh, mipui an bum fin zawh tawh avangin, ram tana an hmachhawp leh an tih tum pawh an sawi ngam tawh lo niin MNF hi a puh a. An sawi tur hre loin ZPM leader beih chu hnapui berah an nei ta ringawt tih sawiin, “Kan sawi tak an intiamna hrang hrangte hi tihlawhtling ni se, tun ang hian an khawsak a ngai lo tur a ni a; anmahni tuhrah an seng a, anmahni thangah an awk a, an buai zo ta a ni ber,” a ti.
ZPM boruak a len zel avang leh sawrkar mai tur anga thawm a rin avangin, inthlan a zawhfel hma chuan, an sawrkar hlaua dawt, thudik lo phuahchawp leh lemchan chawp hmanga beitu an pung zel dawn tih ZPM general secretary hian a sawi a. Heng thil avang hian tumah chiai lo turin an chah tih a sawi.
Thutiama ding nghet lo MNF – ZPM
