Thuziaktute kut hah man tur rawt

Zaithiamte hi a sawmtute’n lawmman pek thin tur a
ni tih hi tun hma deuh khan journalist-te leh mi thahnemngaite’n an sawi thin a, tunah chuan zaithiamte lawmman pek hi inzirtir a ngai tawh lo. Mizo writer-te erawh chutianga sawisaktu chu an awm lo tiin a sawi theih ang.
Writer-te hi thu ziak turin an sawm thin a, khua leh pawl hrang hrangte hi souviner/magazine buatsaih thin an ni ang; chutiangah chuan an sawm a, seminar leh inrawnkhawm nikhuaah paper buatsaih tur pawhin an sawm. Youtube awm hnu-ah youtube-a chhiar tur ziak tura sawm an ni fo a, an hriat lohva lo chhiar ve hmiah thin an awm bawk. Chung thil hrang hrangah chuan kut hah man a awm lo tluk a ni – kut hah man pek nachang hria chu kutchang thliaka chhiar tham an ni ang.
Mizo writer-te hian a thlawnin thu an ziak a, a chang phei chuan anmahni sawmtute hian an thuziak chuanna bu an pe lo thin. Lehkhabu an ziah pawhin a zuartute’n a lakna man tur an bithliah.
Chutiang karah chuan Mizo Writers Association leh Mizo Academy of Letters te’n writer-te kut hah man pek thin ni se tiin an rawt mek. July ni 27 khan pawl pahnihte hi an thu a; souviner, magazine leh lehkhabua chhuah tur thuziakah Rs 1000 tal inpek ni se, seminar paper-ah Rs 2000 tal, youtube-a tihchhuah turah Rs 5000 tal inpek ni se tiin an rel.
An thurel hi rawtna ang deuh a ni a, han lekkawh tak tak theih pawh a ni chiah lo ang. Writer-te sawmtute’n an ngaih pawimawh danah a innghat ang.
“Dan a ni lo a, inkaihhruaina ang deuh a ni mah a, ngenna te pawh a ni ang. Ziak mite sawm thintute leh mipuiin hetiang hian rate a awm ve a ni tih hi lo hre ve se, awmzia a nei mahna kan ti a ni,” Mizo Writers Association president R Lallianzuala chuan a ti.
“Writer-te hi thu ziak turin kan sawm a, kut hah man chu sawi lo, complementary copy takngial pawh pek nachang hre lo kan tam mai. Hetiang ringawt tur hi chu a ni lo kan ti a ni,” a ti bawk.
Writer-te hian hetiang hian a man an dawng ngei ngei tur a ni tih pawh a ni chuang lo tih a sawi a, a writer-ate pawhin tute emaw chu a thlawna ziahsak te pawh an duh thei tih te sawiin, khauh taka lekkawh turah an ngai lo a, mahse a ziaktute leh a sawmtute’n hetiang hian rate a awm tih hre ve hrim hrim se an duh a, chu chu thuziak chawisanna atan a tangkai an beisei tih a sawi.
“Writer-te hi a lawmman dawngtu ringawt an ni dawn lo a, a sawmtu pawh an ni thin tho. Kan thurelah hian a hlawkna teltu tur ringawt kan ni lo a, a sum sengtu tur pawh kan ni ve tho,” a ti a, hetianga rate a awm ve hrim hrim hi tul an tih thu a sawi.