Anmahni thawntu agency-ten Arab rama thawk tura an thawnluh, tiam an nih ang taka chhawr leh enkawl ni ta lo mi 24 chu mi thahnemngaite hmalakna azarah Mizoramah hawpui an ni tawh a, dan lo anga che nia puh agency thenkhat chu an permit cancel tura hma lak mek zel a ni.
The Aizawl Post-in a zawhchiannaah Mizorama agency hrang hrang kaltlanga hna thawk tura Dubai leh a chhehvel hmundanga thawnluh zinga harsatna tawk mi 24 chu Mizoramah hruai haw an ni leh tawh.
Hetianga ram danga hna thawk tura mi thawn thei hi hriat theih chinah Mizoramah agency 44 an awm a, chu’ng zinga agency 26 kaltlanga hna thawk tura chhuakten harsatna an tawk niin anmahni buaipuitu zing ami Lalremsangi Fanai chuan a sawi. Harsatna tawk zinga mi pariat an la tang a, theihtawp an chhuah mek zel tih a sawi. Hetihlai hian sawrkarin khauh lehzuala hma a lak loh avangin ram pawna hna thawk tura chhuak an la awm mek zel tih sawiin, agency thenkhatten an la palzam hle tih a sawi a ni.
Thudawn danin, heng agency tam ber hi Aizawl/ Aizawl district behchhana che an ni a, hemi ang hian Aizawl district bawrhsap office Judicial Branch chuan agency 26 laka FIR lut chu a enzui mek a. Agency thenkhat chu an permit cancel a ngai dawn nia hriat niin, chhuizui mek an ni. DC office hi chuan an permit cancel sak bak hi hma lak thuk zui vak dan an nei lo nia thu dawn a ni.
Tiam an nih anga chhawr ni lo mi 24 lachhuak tawh
