Mihringin a duh thu ni kher lovin thil hahthlak a tawng thin a, chutiang paltlang thei nih chu thil tul a ni ang. Mi thenkhat erawhin an duhthu ngeiin thil hahthlak an hmachhawn a, paltlang an tum thin. Chutiang chu infiamna huangah pawh khawvelin a ngaisang a nih hi. Dara leh Faka te pawhin an duhthu ngeiin thil hahthlak an hmachhawn a, zin kawng hahthlak paltlangin an inkhawmpui a ni.
Aizawl tlangval pahnih K Darthangvela leh C Lalfakzuala te’n kein K|P General Conference neihna tur Saitual an kal thleng a, rawl leh taksa kham them thum chungin an inkhawmpui ve. Hetia kea kal thleng tur hian tuman an nawr lui lo. An duhthlanna liau liau a ni a, mahse an hlim.
|halaite’n ‘fitness’ ngaihlu se an duh a, tunlai thalaite zingah kea kal peih lo, hriselna lamah pawh inthlahdah vanga chak lo an tama an hriat avangin Aizawl atangin Saitual hi kein an kal a ni.
“|halaite hi ruihtheihthil hian min tibuai a, zu leh ruihhlo do nana ka tih ve theih tawk ti-ah ka inngai a. Ruihhlo tel lova fit tak a nih theih a, kein thui tak tak kan kal thei a ni tih lantir ka duh a ni,” Dara chuan a ti a, “Kea kal hi thalaite hian uar ila ka duh a, taksa tih-fit hi tum ila ka ti a. Chu chu hetia ka kal chhan hi a ni,” Faka pawhin a ti.
Dara hi Bawngkawn Shalom veng a ni a, February ni 24 khan kein Aizawl chhuahsanin Selingah zan a riak a ni. A tuk zingah kein a chhuak leh a, tlai dar 5.14 velah Saitual a thleng. Faka hi Bawngkawn Chhim Veng a ni a, ani hi chuan Saitual hi a ban. February ni 26 khan a chhuak a, darkar 12.55 vel a thang. A smart watch-a a lan dan chuan, km 69-a thui a kal.
“Zep lohvah chuan ka chau, a hahthlak ve khawp mai,” Dara chuan a ti a, “Ka chau vak lo a, mahse ka mal a puam a, ka kephah a durh bawk a,” Faka chuan a ti.
Dara hian hetianga kea thui tak kal hi a la ti ngai lo a, inkhawmpui tura Saitual kal thlen a tum thu pawh hi mi bulah a sawi ngam lo. Hritlang khawsik vangin a khum bet leh nghal a, Chawlhni leh Thawhtannite a khum beh hnuah Thawhlehniah a chhuak a ni.
“Mi bulah ka sawi ngam lo a, keima tum tumin ka tum ve ringawt. Ka chhuah dawnin ka nuin Í ti lui tlat bawk si a,’ tih zawng a sawi,” a ti.
A hmain kea a kal thui ber chu km 12 a ni a, Aizawl atanga Saitual kal a hahthlakna a sawi chu, Zemabawk atangin Tuirial thlengin kawng a chhuk char char a, Tuirial atangin Tuirini thlengin a chho leh char char a, chutianga chhuk leh chho kal chu a dan a dang a ti.
“Zu leh drug hian thalaite min tibuai a, hei hi ka vei em em mai a. Ka tih ve theih tawk chu hei hi a ni ka ti a ni ber. Taksa leh rilru lama fit hi thalaite’n kan tum a ngai ka ti a, tiang hian ka aupui ve rawih mai a ni,” Dara chuan a ti.
Faka hi chu marathon velah te pawh a lo tel tawh thin a, insawizawiin Bawngkawn Chhim Veng atangin Seling te pawh kein a lo kal thleng tawh. 2023 atangin theihtawp chhuahin a insawizawi a, kg 105-a rit kha kg 68 a ni tawh.
“Ruihhlo leh zuk leh hmuam hian thalaite min tibuai a, thalaite hi a rukin kan hrisel lo. Kan fit lo a, thil kan ei vak vak a, kan taksa hi a fit lo a ni. Hei hi ka vei a,” a ti.
“Kea kal hi thalaite hian uar ila ka ti em em mai a. Kea kal kan tum lo hi ka vei a, dik chiah chuan tawi te pawh kan kal peih lo, lirtheia kal zel kan tum. Ruihhlo leh zuk leh hmuam hi do ila, kea kal uar ila, chu chu kan mamawh ka ti a, chumi campaign nan chuan Saitual pawh hi kea kal thlen ka tum ve a ni,” a ti bawk.
Tiam chin lam chu an pan talh talh a ni
