Tiamchin awm loin school khar

Intiamna tihhlawhtlin phutin lumpsum aided higher secondary school pakua chuan tiamchin awm loin school an khar tan.
Kum 2008-a lumpsum aided school-a sawrkarin a hlankai school 9 intelkhawmna, Mizoram Govt. Lumpsum Aided Higher Secondary School Association (MIGLAHSSA) hruaitute sawi danin, adhoc grant in aid-a hlankai phuta August 28-a school kal tho sia zirlai an zir loh hnu ah, August 29 atang khan tiamchin awm loin an school hi an khar tan tih an sawi.
2018 MLA inthlan dawna adhoc ngiata movement na tak – ni 41 school khar, road block leh khaw chhunga sawrkar office an khar hnu ah Aizawla kawng zawh tura an inruahman laiin, tuna sawrkar hruaitute hian an tlin phawt chuan an tih ngei tur thu an hrilh a.
Sawrkar thar a pian veleh chief minister pawh hmuh nghalin, inthlan hmaa an boruak leh a ministry hnuaia beiseina sang tak an neih thu te an sawi a. An thil ngiat, adhoc grant in aid pawh remchang hmasa bera tihsak tura ngen nawnin, lawm takin an inbia tih an sawi a ni.
Hemi hnu hian School Education minister pawh MIGLAHSSA leh school mal Managing Board ten vawi tam an hmu a, beiseina sang tak nen adhoc hun an thlir laiin, school upgradation kalpui a nih dawn tak tak chuan sawrkar sum harsat zia leh sumin a daih ve tak loh thu an hre leh ta si tih MIGLAHSSA hruaitute hian an sawi bawk.
‘Sawrkar hian sum an harsat thu an sawi chu kan hre thin; mahse, sawrkar aiin kum 20 zet school lo hahpui tawhtu thingtlang khaw mipui hi kan rethei zawk, tih sawrkarin min hriatpui se kan duh a. Khawtlangin kan mamawhna a san em avangin, min tiam tawh angin adhoc grant in aid tura a ngaihna min zawnpui theih kan ring a ni,’ an ti.