Hmunphiah hal a hun a, hmunphiah keh loh a la tam chungin, tihngaihna hre lo tak chungin Vairengte-a hmunphiah hmun neitute’n an hmunphiah hmun an hal tih thu dawn a ni.
Hmunphiah hralh kawngah harsatna an tawh nasat avangin hmunphiah keh loh a tam a, mahse kum thar atan a hmun hi hal a hun tawh si a, tihngaihna dang an hriat loh avangin an sam a, an hal ta a ni, an sawi danin.
Hmunphiah hi February thlaah an kek thin a, hetia an keh hian an sam nghal tihna a ni a tel. An keh zawhah an tifai a, a thar lo to nan an hal thin. Kuminah chuan keh loh a tam a, kek leh hnuhnawh dawn pawh ni se a hun tawh lo, a rah tawh a, kek pawh ni se a hmantlak tawh loh. March ni 15-a hal hman tur tih a ni a, chuvangin hmunphiah la awmte chu samin an hal ta a ni.
‘Tihngaihna dang kan hre chuang lo a, kan han hal leh ringawt chu a ni a. Hal lo ila awmzia a awm lo a, hal ila awmzia a awm ang em tih pawh kan hre chuang lo a. Hal loh ngawt kha a dik si lo a,’ hmunphiah huan neitute chuan an ti.
Hmunphiah kek lova hal hi a tam tham viau tih an sawi a, mahse huan neitu thenkhat chuan keh/hralh kha a tam zawkin an ring.
Hmunphiah hi a hralh hun tawp lamah a hring kg 15 atangin Rs 13-ah a tla a, Rs 15-a an hralh pawha hlawk tawh lo kha, Rs 13-in mangang takin an hralh a ni.
A thartute sawi danin, 2022-ah khan a hring hi kg-ah Rs 63 te a kai a, a hniam lai pawhin Rs 30-40 te a ni. Nikum khan kg-ah Rs 54-56 te’n an hralh a, a tlawm laiin Rs 40-50 te a ni. Kuminah hian a tir lamah kg-ah Rs 25-in an hralh a, February ni 19 atangin Rs 15-ah a tla. Rs 13-ah a tla leh a, chumi hnuah phei chuan hralhna tur an hmu lo.
Tunah hian a ro hralh tur an la nei a, hei pawh hi a man a tlawm avangin an mangang hle. Inrinni thleng khan hralh an awm a, kg-ah Rs 40-55 velin an hralh a ni. A ro hi nikum khan kg-ah Rs 130 a ni a, 2022 kha a to ber kum niin, kg-ah Rs 160 te’n an hralh.
Tun hma atangin Vairengte-ah hian hmunphiah an lo kek tawh thin a, a hmun neia hna bera an neih tan kum chu 2005 leh 2006 vel kha a ni. Kumin angin a hralh kawngah harsatna an la tawk ngai lo tih an sawi.
Kumina hetia an buai hi, sorkarin a man (rate) tur a bituk vangah an ngai a, sorkarin hniam takin a man tur a bituk a, chumi hria chuan mazon-te’n tlawm taka lei an tum ngam ta tih chu an hmuh dan a ni.
“Hmunphiah rate hre lovin sorkarin a rate a fix a. Sorkar rate siam kan hmuh khan hmunphiah man a tlawm dawn tih kan hre nghal a, kan mangang daih tawh,” hmunphiah hmun neitu pakhat chuan a ti.
“Sorkar rate siam anga sorkar-a hralh ai chuan, chumi hmaa a aia tlawma kan hnena hralh an duh zawk dawn tho tih kha mazon-te thlir dan a ni a, a dik chiah reng bawk a. Sorkar chuan kan duh hunah a lei vut vut dawn lo tih an hre sa a. Chuvang chuan a rate hi mazon te’n an duh dan danin an siam ngam a ni,” a ti bawk.
Mizoram sorkarin 2024 atan hmunphiah ro Grade A kg-ah Rs 100, Grade B kg-ah Rs 80 aia hniam lo tur tiin a bituk a ni.
Hmunphiah huan neitute hi an mangang a, an sum lakluh a tlakhniam duai avangin an harsa dawn tih a chiangah an ngai. Hmunphiah bawk an buaipui ngam leh ang em tih an chiang lo a, mahse a thlak maina tur an hriat loh bakah hmunphiah hmunah hian thlai dang a that theih loh avangin an huanah hian thil dang a tih chi loh tih an hria a, chuvangin mangang takin an awm tih an sawi.
Tihngaihna hre lo tak chungin hmunphiah hmun hal
