Rev Dr Ramengliana
“Ngai teh u, chinghne zînga berâm lût angin ka tirh che u hi; chuvângin, rûl anga finga, thuro anga pawi khawih lovin awm ang che u.” Mathaia 10:16
Kan ramah hian Kohhran a chak avang leh ringtute kan thathnem avang hian Pathian rawngbawltute pawh kan mawmin Pathian rawng bawl hi dinhmun duhawm tak siam nana ngaih theih a ni deuh roh ta tlat mai a. Thenkhat phei chuan Pastorte chu ‘First Class Officer’ ang level-ah an ngai hial a ni! Engemaw zawng tak chuan hei hi thil lawmawm angreng tak a nih laiin a tir atanga kan Lalpa’n rawngbawltu dinhmun leh nihphung tur a sawi nen chuan a inkarakik ta deuh a ang thin a. He thlarau rawngbawlna leh rawngbawltu nihphung tur thenkhat han sawi nawn leh lawk ila.
Chinghne zinga beram ang
Lal Isuan a rawngbawltute a tirh chhuah hian an dinhmun derthawnzia a hmu pha chiang hle. Chinghne tan beram hi chaw tui ber a ni a. Beram hian mahni han invenna ‘defensive system’ a nei miah lo emaw tih theih khawp an nih avang hian man an awlsam em em bawk a ni. Beram tlahlang an hmuh chuan ngah sa a ni ringawt a. Chutih laiin chinghne zinga beram va lut tan chuan fimkhur a va ngai dawn tehlul em! Ngam loh leh an hrawk chawm nana min ei duh an va tam dawn! A hlauhawm zawnga sawi pawhin dinhmun hlauhawm tak a ni. Chu chu a rawngbawltute dinhmun a ni si a.
Pathian rawngbawltute hi kan ‘confi’ lutuk ve thei tih hriat a tha ngawt mai. Mahni inrin tawkna hi a tha lo zawnga thawkin mi dang dah hnuaina lamah a thawk daih thei a, chu chu rawngbawlna atana thil pawi tak a ni. Rawngbawltu nun chu a derthawn deuh loh chuan miin ei har an ti fo a ni awm e. Damchhung khawsak dinhmun tha lutuk te, finna leh hriatnaa san lutukte rawngbawltu nun tituihnang lotu an ni thei thin. Tunlai kohhranten rawngbawltute duat kan thiam mek lai hian hei hi hnianghnarnain a ken tel pakhat a ni tih hriain thlarau nuna hneh a tul thin a ni.
Rul anga fingin
Rawngbawltu chu chinghne zinga beram ang chauha dinhmun derthawnga awm a nih avangin rul anga finga awm tur a ni. Hmanlai Aigupta mi fingte chuan rul hi finna entirnan an hmang thin an ti. An fimkhur thiam a, an duh an hria a, an mamawh sa pelh dan pawh an hria a ni. Rul ze mak tak chu lang sar lovin thawm an nei ve vak vak lo hi a ni. An meng kar mai a, dim tein an thil tum an um ngat ngat thin. Heti zawnga finna kawngah tal hian rul ang nih hi a pawi awm lo ve. Finna hi pianpui thil a ni a, zir theih chin pawh a awm tho. Mahni tawkah kan inzir theuh a pawimawh a ni ber mai.
Thenkhat chuan Thlarau Thianghlim hruaina an changchawi luatah rilru hmang tura inbuatsaihna lam hi an ngai pawimawh tawk lo deuh thin a. Hei hi Hmelmapa bumna chi khat a ni tih kan hriat a pawimawh khawp mai. Thlarau Thianghlimin hna a thawh dawn chuan inbuatsaihna a kal kan a tul kher lo tih hriat a tha. Chutiang thil zawng zawng hmang tangkai leh chutiang thil piah lam thleng pawh chuan Thlarau Thianghlim chuan hna a thawk thei a ni zawk. Mihring inzirna te, inbuatsaihna te, leh finna te Thlarau chuan a hmang vek, mahse hemi piah lamah a che bawk thin a ni zawk. Thlarau tanpuinaa inbuatsaihna tha te, inzirna tha te, fimkhurna dik te neih tum zawk tur a ni.
|huro anga zaidam tur
Thuro hi ran zaidam ber, pawi khawih ngai miah lo, thianghlim anga ngaih a ni tlangpui a. Thlarau Thianghlim symbol atan an hmang deuh ber a nih hi. Ringtute chu he khawvelah hian pawi khawih kan hlau hle tur a ni a, rawngbawltute lek phei chu hetiang thil atang hian kan inthiarfihlim hneh hle tur a ni ang. Kan duh vang ni miah lo va buainain min nanchin hunte pawh a awm thei ang a, mi dangte humhim tura din ve hun te pawh a awm ang. Mahse, a pawi khawihtu nih leh Krista rawngbawltu nih chu a inhmeh thei ngang lo a ni.
Mihring rilru pianphung pangngai hi chu phuba lak duh thin rilru a ni tih hi a chiang hle. Kan chunga ti tha duh lo nia kan hriatte chungah chuan remchang kan neiha tih that loh ve sak a chakawm thin a ni. Chutiang chu rawngbawltu nuna thil pawi ber a ni thei. Phuba lak rilru hi Pathian duh loh zawng tak a ni bawk a. Chuvangin rawngbawltute chu thuro anga awm a, remna leh ngilneihna nunpui tlat turin min chah lawm lawm a nih hi. Intih deuh sak sak, innghirngho deuh rap rap um deuh tlat hi thil awm thei tak a ni ve tlat mai a. Loh theih lohva insut hun awm teh meuh mah se, a theih chhung chu mi zawng zawng nena inremna hi um tur a ni.
Mawhphurhna hahdam tak a ni lo tih a chiang
Rawngbawltu der awm theih a nih laiin Pathian duh dan taka rawng bawl tum tan chuan lem chan mai mai theih a nih lohzia a lang chiang thin. Isua khan ama rawngbawltute dinhmun a hre chiang hle bawk a. Chinghne zinga beram intat lut ang hialin a sawi a nih kha. Chu chuan rawngbawltu dinhmun derthawnzia leh fimkhur reng a ngaihzia a sawi chiang hle. Vawiina Pathian rawngbawlna hna tam tak hna tha leh duhawm, inchuh leh dinhmun thaa invawrhna anga ngaih theih hian a han ni ta te hi a mak hle zawk a ni. Tunlai mite kan vanneihnaah ngai mai ila, a tir atanga a awmzia kan Lalpa sawi erawh hi chu theihnghilh hauh loh tur a ni ngei ang. Kristian ram kan nih leh Kohhran chak tak chhunga kan awm vang hian rawngbawltute nihna tur dik tak hi hmaih loh tur a ni. Chu chu khawvel mamawh a ni reng dawn si a.