Mizoramah ni thum chhung vel ruah a tlak tam deuh hnu ah chhiatna hrang hrang hriat tur a awm a. Leimin bakah hmun thenkhatah tuilianin nunphung a tikhaihlak.
Hriat theih chinah Chawngte ah Tuichawng lui lian vangin chhungkaw 45 vel chuan an chenna an chhuahsan tawh a, tuiin a chim theih mai tura ngaih chhungkaw thenkhat pawhin an bungrua an thiarchhuak tan tawh a ni. Ruah a la tlak zel chuan tuilian hian chhiatna nasa zawk a thlen thei dawn tih thu dawn a ni. Tuilianin an chenna in a chim chhungkaw thenkhat hi school leh sawrkar hmun remchangah te dah an ni.
Khawthlangtuipui lian vangin Tlabungah leh a chhehvelah pawh chhungkaw 30 chuang chuan an chenna an chhuahsan tawh tih sawi a ni.
Tlabungah chhungkaw 30 vel bakah a bulhnai khua Nunsury leh Tippereghat ah chhungkaw 10 chuang chuan an chenna an chhuahsan a. Tui hi a la lian zel a nih chuan hei aia tam hi chhungkua a nghawng thei dawn tih thu dawn a ni.
Insuanchhuah ngaite hi Tlabung VC, YMA bakah Young Pahari Association chuan an buaipui a. Tlabunga truck neitu intelkhawm chuan bungrua thiarchhuahna atan a thlawnin an lirthei an thawh a ni.
Tlawng lui lian zelah Sairang lam pawh an inralring tan mek tih thu dawn a ni a. August 7 thleng kha chuan nul thenkhat chim ve deuh chu nei mah se, an thlai tihchhiat leh chenna in atanga inthiarchhuah ngai an la awm lo tih an sawi a ni.
Ruahsur hian leimin pawh a siam belh zel a. Hunthar Veng huamchhung National Highway 54 chung, Vaivakawn Zohnuaia lei tawlh chu a la chet reng avangin, in tluk pui mai theih pawh a la nei a, lirthei tan zawh ala him lo tih sawi a ni a. Thawhtanni chawhnu khan Chanmari – Ramhlun kalna, Laldenga Road chu kawngchhak lung a tla chuan kawng a hnawh a, lirthei kal theiha tih tlang lehnghal a ni.
Lunglei leh Lawngtlai inkarah kawngchhak leiminin kawng a hnawh a, thenfai lehnghal a ni. Lunglei Tourist Lodge kawng panna lei che thin chu tunhnaiah a che thar leh a, tawlh mai thei dinhmunah a ding tih sawi a ni.
Lunglei leh Tlabung inkar NH 302-ah pawh leimin vangin hun engemawchen chu lirthei a tlantlang thei loa, kawng hi tih tlang leh a ni tawh a ni.
Tlabung leh Chawngte Tuilianin a tibuai
