ZPM leader Pu Lalduhoma, chief minister chuan ram mipuiin an enchhin tih sawiin, enchhin zel tura a duh thu a sawi a. An hnathawh atangin mipuiin endik se a duh thu te, tlak huama hna an thawh tur thu leh, ni 100 chhunga an tihtur an puante chu khawng taka an kalpui tur thu a sawi bawk a.
‘Tlak huama hnathawh’ tih hi, a awmzia deuh ber nia lang chu – ‘inthlan leh hunah mipuiin min vote zui duh loh phahna tur pawh ni se, ram leh hnam thatna tur nia kan ngaih chu kan tih thulh phah dawn chuang lo’ tihna a ni awm e.
Hemi ep zawng hian awmzia a nei thei bawk a, chu chu – ‘kan intiamnate hi chu tlin kan duh vanga ti kan ni a, kan tawng liam ve mai mai a, inthlan leh hunah mipuiin min thlan tlin leh duh loh phahna tur pawh ni se, tun term chhung hian mahni kan inhaivur ve dawn, duh leh tla thum dawp mah ila, pawi kan ti lo’ tih hi. Chutianga an kal phawt chuan an tla ngei ang a, chumi pawisak lohna chu ‘tlak inhuam’ tih hian a kawk thei, a tih theih bawk awm e.
Hei hi chu tuna sawrkar tharin kalpui a tum dan chu a ni lo tih a lang chiang sa a.
A awmzia pakhatna zawk hi han ngaihtuah chian chuan awmze nei lo tak angin a lang thei a. Ram leh hnam thatna tur leh hmasawnna tura theihtawp chhuaha hna thawk na na na chu engvangin nge mipuiin an vote loh teh lul ang? Chuvangin hei hi ‘tlak huama hnathawh’ ni lovin, ‘tlin leh ngeina tura hnathawh’ a ni zawk ang chu, a tih theih awm e.
A nihna takah chuan ‘tlak huam’ tih hian awmze ril tak a nei a. Ram leh hnamin a chhiatpui theih tur pawh ni se, ‘vote bank hlohna tur’ ni tlata hriatna avang leh, vote bank huang chhung amite tih lungnih loh hlauh vanga thil tha lo pawh kaltlangpui mai zel ang kha, keini chuan kan ti ve dawn hauh lo a; inthlan leh hunah tlin loh phahna tur pawh ni se, tlak huamin kan ti ve lo ngam dawn a ni, tihna a ni ber awm e.
Kan ram sawp chautu ber pakhat chu, inthlan leh hun thlir rana ramin a tawrh phahna tur thil pawh tih pawisaklohna hi a ni.
Tlak huama hnathawh….
