Economic Survey of Mizoram 2025-2026-a statistical report-ah, thil chi hrang hrang, a hma aia tlakhniamna tam tak a awm a, chung zinga pahnih chu – “Enrolment in Primary Schools” tih leh “Production of Rice” tih a ni.
Kum nga vel kaltaa Economic Survey-a kan hmuh dan chuan, kum 2020-21 chhunga Primary School-a enrolment chu 1,10,353 a ni a. A kum lehah a sang zawngin a chho ngar ngar a, 2023-24-ah phei chuan 1,42,575 a tling a. A kum leh chiah 2024-25 chhung khan enrolment hi 95,911-ah a tla hniam ta thut mai a. Hemi kum hian Primary School awm zat hi a hma kuma awm zat 1938 atangin 1945-ah a lawn chho zawk a, enrolment erawh a hma kum aiin 46,664 zetin a tlahniam ta thung a ni. Heti tak maia kum khat chhunga primary school enrolment a hniam thei mai hi, statistical record tih sual palh vang em ni ang a tih theih rum rum mai a. Hei hi a chhan leh a vang eng nge tih hriat hi thil pawimawh tak a nih a rinawm a; eng inthlakdanglamna (change) nge thleng ta? tih hi hriat a tha khawp mai.
A dang pakhat Rice chungchangah chuan, statistical overview-a a lan dan chuan Principal Crops pali, Rice, Maize, Pulses leh Oilseeds te tarlan a ni a. Rice hi kan rin pui ber (staple food) a nih avangin han thlurbing ila.
Kum 7 kal ta 2018-19 a Mizoram buh thar zat chu MT – 60,010 a ni a, 2019-20-ah MT – 60,239; kum 2020-21 ah MT – 62,182; kum 2021-22-ah MT – 37,137; kum 2022-23-ah MT 58,836; kum 2023-24-ah MT – 39,924; kum 2024-25-ah MT – 35,322.
Kum 2021-22 hi COVID kum a nih avangin a hma kum aiin a zatve deuhthawin a tlahniam a, mahse a kum lehah a rawn sang leh a, kum 2023-24 khan a tlahniam leh ta a, kum 2024-25-ah phei chuan COVID kuma tharchhuah pawh a zat ta lo a ni.
Buh thar a tlakhniam chhan hi sawrkarin Sawhthing a lei dawn vangin Sawhthing lamah an insawn nasa a ni ang tih a rin theih a. Kum 2023-24 chhunga buh chinna Hectare 24,615 atangin Ha 20,665-ah a tlahniam dawrh nghe nghe a; hetih lai hian sawhthing chinna hmun zau zawng hi Hectare 11,000 chuang nia report a ni bawk.
Hriat theih chinah, nikum 2025 khan sawrkarin sawhthing a lei zat chu quintal nuai 3.5 vel a ni a, pawisa pawh cheng vaibelchhe 120 vel sen a ni. Chumi awmzia chu, Economic Survey luah pha chin heng Principal Crops kan tih Rice, Maize, Pulses leh Oilseeds te ai hian Sawhthing buaipuina sum che vel hi a tam daihin a rinawm a, chutih laiin Mizoram Economic Survey 2025-26 a luah lum pha si lo hi, eng nge a chhan ni ta ang? tih te pawh hi hriat a chakawm a ni.
Tlakhniamna pahnih
