Bangladesh-a Chittagong Hill Tracts atangin Zo
hnahthlak 1000 bawr chu Mizoramah an raltlan tawh a, Mizoram pana tlanchhia mi thenkhat chu kawngah an thang mek tih thu dawn a ni.
Ramri velah BSF an duty ngawrh em avangin Bangladesh atanga Mizorama tlanchhiat tumte hian Mizoram an lut hlei thei lo a, BSF te hian engemaw zat chu an kirtir tawh bawk. Chutiang karah chuan a ruka Mizorama lut an awm zeuh zeuh.
Thu dawn danin, Chittagong Hill Tracts-a an khua chhuahsana Mizoram pana chhuak, an tlanluh tumna khua la thleng si lo, kawng laka thang mek an awm a, Mizoram an lut tawh em tih pawh hriat a ni lo.
Kawnga thang mekte hi mi 100 bawr nia hriat an ni a, ramhnuaiah an awm nge tih te hriat a ni lo.
Chittagong Hill Tracts-ah hian Bangladesh sorkar sipai leh Kuki-Chin National Army te an inbei a, Bangladesh sipaite hi Myanmar hel pawl Arakan Army te nena tang tlang nia ngaih an ni. Tunlai hian an inkap nasa a, Bangladesh depa awm Mizoram khaw thenkhat atang pawhin an thawm an hre pha thin.
Chittagong Hill Tracts-a Zo hnahthlakte zingah Mizorama tlanchhiat duh an thahnem a, mahse BSF an duty ngawrh avangin Mizoram luh a har tih hriain, tlanchhuak hi an tam lo zawk nia sawi a ni.
A ralti tih an hriat avangin Chittagong Hill Tracts atanga tlanchhuakte hi tlem te tein an kal a, May ni 18 khan a hlawm lian thama kal mi 206 te’n Mizoram an thleng leh. Chumi hnuah chuan a hlawma kal an awm leh nia hriat an ni a, tuna kawnga thang mekte hi ni turah ngaih an ni.
Tlanchhiate kawngah thang mek
![](https://theaizawlpost.org/wp-content/uploads/tap_logo-min-large.jpg)