Pull-up chu kan sawi fo tawh a, exercise lak dan hahthlak tak a ni a, chunglama bar khama lei rap lovin an uai a, ban an tingil a, chutah kiu-ah ban tithlepin an inpawt kang a, bar chunglamah khabe an dah chhuak a, chumi hnuah kiu an timar leh thin.
Xavier Dillard, kum 22, Virginia a cheng chuan darkar 24 chhungin hetiang pull-up hi vawi 12,412 a tihman a, Guinness World Records title kawl mektu a rawn khum tlat. Xavier hian Inrinni chawhma dar 10 atanga tanin, Pathianni chawhma dar 10 thlengin pull-up record hi a siam a, a hmaa hetiang record chu kumin January ni 31-a Mexico-a an siam niin, darkar 24 chhungin pull-up vawi 12,435 an ti a, he record hi Xavier hian pull-up vawi 67-in a rawn khum a ni. Mahse, Xavier-a record hi Guinness lamin official-in an pawmpuina an la tichhuak lo.
Chawhrualin Xavier hian darkar tinah pull-up vawi 517 tihman zel ang a ni a, minute khatah vawi 8 chuang hret tihman ang a ni bawk. Record siam tur hian darkar 24 chhung a uai char char kher a ngai lo a, a duh duh hunah a chawl thei a, darkar 24 chhunga a pull-up tihhman zat kha chhiar mai tur a ni.
Xavier chuan a tawp lam chu harsa a ti tawh hle niin a sawi a, a khaw hmuh te a phe vek tawh a, mahse, record siam ngei a duh avangin a tilui tang tang niin a sawi. He record siam tum hian kum hnih a inpuahchah tawh niin a sawi a, nitin pull-up tiin a ti tam telh telh a, a training lai chuan darkar li chhungin vawi 2,400 tih chang te a nei niin a sawi.
Tlangval kum 22 miin pull-up record a siam
