Tlawm zana chhuaktau nghawng nghawng Ronaldo!
Ningani zan Saudi Pro league-ah Al-Ittihad hneh loin a club vawn lai Al-Nassr sikhat faiin an tlawm a, inkhelh banah goal thun thei lo thinrim Cristiano Ronaldo chuan lungawi lo taka khelmual chhuahsanin, tunnel a panna kawnga tui bottle lo inhung tlar chu a pet darh chuai!
Ti hian, Portuguese superstar hian a zawnin match hnih chhung a team tan goal a khung zo ta lo a; hun pekbelha a hun tha neih Al-Ittihad goalkeeper Marcelo Gro-he-a’n a namper sak kha kum 38 mi Ronaldo goal thun theihna ‘chance’ tha ber a ni.
He inkhela goal awm-chhun leh Al-Ittihad chak-na goal ni zui ta kha hun tawp hma minute 10 la awma Brazilian Romarin-ho tihluh niin, Ningani zana an point thum hlawh-chhuah hmangin league table-ah Al-Ittihad-in Al-Nassr an lehpel a, hma an hruai ta.
Saudi Pro league in-khel ngaihven hlawh leh hmahruaitu nih inchuhna match-ah hian inkhelh chhung zawngin Al-Ittihad fans lamin Ronaldo an chhaihkual a, a thin tiur thei tur ang zawnga khawsa lui ngar ngarin, kawng eng-kima a elpui kumhlun tih theih Lionel Messi hming an lam ri mup mup!
Season kal laia league game sariha goal riat khung tling tawh Ronaldo hian mual a chhuahsan hmain a captain armband a phelh a, a vawm zui bawk!
Thinrim insehruh tun chunga khelmual chhuah-san ni mah se mual a chhuahsan hmain Al-Nassr supporter-te chibai buk erawh a hmaih bik lo!
Portuguese hian a hnu lawkah Twitter kaltlangin thawm a rawn nei zui a, “Kan result-ah lawmna tur awm lo mah se season kal lai leh kan game khelh leh tur lamah kan insawr-bing zui dawn a; min thlawp tlatna avangin Al-Nassr fans chungah lawm-thu ka sawi a, kan chakna hnar in ni e,” tiin.
Tlawm zana chhuaktau nghawng nghawng Ronaldo!
![](https://theaizawlpost.org/wp-content/uploads/2023/03/ronal.jpg)