MIzote zingah tlawmngaihna tlahniam zela a lan avangin, hemi ven kawngah Mizoram Upa Pawl chuan hma lak a tum.
Mizoram Upa Pawl General Assembly vawi 49-na chu Thawhlehni khan Aizawlah neih a ni a. Mizoramah tlawmngaihna tlahniam ven nan MUP-in hma la se, tun aia chak zawkin nungcha humhalh kawngah sawrkarin hma la se, an ti.
Old Age Pension bik hmu tur leh thlakna tur buatsaih chungchangah MUP Branch-te sawrkarin ngaipawimawh lehzual se, an ti a. Local Council /Village Council term chu kum 5 niloin kum 3 ni turin sawrkarah thlen nise, an ti bawk.
Chawhma hun hi an president Nghaklianmawia’n kaihruaiin, Mizoram sawrkarin Old Age Pension atana thlatin Rs 100 a tum ve thin chu, sawrkar kum thar hman tan mek atangin Rs. 1000 a tihpun a nih avangin lawmthu an sawi a. Zemabawka MUP ramah cheng nuai 290 man MUP building sak a nih dawn avangin sawrkar chungah lawmthu an sawi bawk.
General assembly hi Social Welfare director Dr Lalhriatzuali Ralte chuan hmanpuiin, sawrkarin kum upate tana scheme hrang hrang a neihte bawhzui mek a nih thu te, MUP-in Recreation Centre an neih theihna tur leh upate hamthatna tur an buiapui mek te a sawi a ni.
Chawhnu hunah rorel a ni a. District Headquarters hruaitute, Area leh Branch hruaitute an tel. Kum 2024- 2025 budget atan cheng nuai 83 an pass a ni.
Tlawmngaihna tlahniam tur vengin MUP-in hma lak rawt
