Tlawng humhalh kaihnawihah
NGT-in Mizoram sawrkar a kar
Tlawng hnar humhalh kaihhnawiha National Green Tribunal-a thu ngaihtuah mekah Mizoram sawrkar chuan thawhpui tha tawk loin a hria a, an hmaa inlan turin Mizoram chief secretary a ti.
Tlawng lui hnar awmna lam, Lunglei Zobawkah state sawrkarin sports academy din a tumnaah helai hmun hi Tlawng lui Riverine Reserve Forest chhunga awm leh ramngaw tihchhiatna mai bakah phalna tel loa thil tih a nih thu hi environmental activist Vanramchhungi chuan National Green Tribunal (NGT) hnenah ‘petition’ a thehlut a, Tribunal hian 2022 November 21 khan hemi chungchang hi a ngaihtuah tan a ni.
Hemi chungchang ngaihtuahnaah hian Mizoram state sawrkara ding tura ruat, additional advocate general chu inlan hun tura ruatah a inlan loh thin avang leh petition thehluhah counter affidavit thehluh tur pawh state aiawhin thehluh a ni thin lo tih Tribunal hian sawiin, inlan leh hun tura an tihah chuan, thehluh tul thehluh a nih loh chhan leh state sawrkar aiawha ding tur a inlan loh fo chhan hi sawifiah a, sawifiah ngai thildang pawh sawifiaha inlan turin state chief secretary chu a hriattir a, a inlan dan turah erawh amah kal kher loin inbiak hmuh theihna hmanga tih a nih tur thu NGT hian a sawi.
Petition thehluttu Vanramchhuangi chuan Mizorama luia sei ber leh pawimawh ber, Mizoram khawpui pahnih chawmtu, pipute atanga vawiin thlenga chhungkaw tam takin Tlawng lui hausakna eibel bera an hman chu a hnarah Mizoram sawrkarin project lianpui pui a kalpui a. Mimal pawhin lung lakna te, tawngtaina in leh lui hnar kam seta leihnuaia tui pump chhuahnate an siam a. Tlawng lui hnar tichingpentute hian environment dan leh hrai zawng zawng an bawhchhia a, Tlawng lui tui ringtute chu tui thianghlim tlakchham theihna dinhmun derthawng taka an siam a ni, tiin, NGT hnenah hian complaint a thehlut tih a sawi.
“NGT-a ka dil ber chu – tuihna a lo pun leh a, thala a kangchah tawh lohna’n Tlawng hnara humhalh huamchhungah mihring leh a kutthlakna zawng zawng tihtawp vek ni se, tih a ni. Tlawng hnara sawrkar project hi hmasawnna khingbai /kebul (unsustainable development) a ni a. Mimal invalhna zawng zawng pawh tuihna leh tui tawmbuk zah lohna a ni,” tiin, The Aizawl Post a hrilh.
Mizoram sawrkarin environment dan leh hrai zahpah lo taka hmasawnna khingbaia a kalpui tawh thin vangin mipui sum (public fund) tam tak engmah lohah a luangral a. Environmental /forest clearance ngaihthah vanga NIT Lengpui puitling thei lawk lo leh Chalfilh tourist destination pamtulte hi a pamhmai em em a ni. Tun atangin hmasawnna liantham thawh dawn reng renga pawimawh hmasa ber, environmental /forest clearance hi ngaihpawimawh hmasak bera nei turin a ngen nawn tih a sawi bawk.
Hearing hi kumin August 3-a neih leh turin NGT hian a ti a. Tribunal-ah hian judicial member Justice B Amit Sthalekar a thu a, expert member-in thutpui thinin tun tumah hian Dr Arun Kumar Verma a thu a ni.
Tlawng humhalh kaihnawihah NGT-in Mizoram sawrkar a kar
