Mizoram lui hmingthang Tlawng lui a nu thin a, Aizawl mipui tui tlan Tlawng tui hi mipui hnena sem hmain tifim tura beih fe a ngai thin. PHE department-in tui nut chhan hi an hmuchhuak.
Ramngaw a chereu nasa a, lei a min nasa a, hei hi Tlawng lui nut chhan ber a ni tih chu an hmuh dan a ni.
PHE minister Prof Lalnilawma’n amah kawmtu thuthar lakhawmtute a hrilh danin, Tlawng nut chhan hriat tumin PHE department-in Greater Aizawl Water Supply Scheme hmanga tui lakna hmun, Reiek kai leh Darlung inkarah Tlawng lui hi an zir a, drone hmangin thla an la a, chutah chuan ramngaw a chereu vanga lei a min nasat vang a ni tih an hmuchhuak a ni.
Muallungthu ram chhung hmun hrang hrangah lei a min nasa a, chu chu tui tinutu a ni tiin a sawi.
Tui nut chhan an zirchianna atanga an hmuhchhuah an data te chu tui nu ven theihna tur project lian tham deuh siam nan te pawh an la hman tangkai theih tur thu a sawi a, kan hmalakna hi tuna kan harsatna tawh mek sutkian nghal theihna ni lo mah se nakin zel atana la tangkai tur a ni, a ti. Department-in tui nut chhan an zirchian vawi khatna a nih thu a sawi bawk.
Tun hnaiah Tlawng lui a nut avangin tui sem hna thawktu PHE department-in harsatna an tawk fo a, tihfim hleih theih loh khawpa a nut chang a awm fo. May ni 28-a remal cyclone leh a ruah kenin Mizoram a nuai pawh khan Tlawng lui hi namen lovin a nu a, tui fim lam tehna NTU (Nephelometric Turbidity Unit) 5 hnuai a nihin tui hi sem tlakah ngaih a nih laiin remal cyclone tleh hlimah khan NTU 1000 a pel. Chumi hnuah pawh NTU 900, NTU 800 te a ni. Hetianga nu hi a tihfim a hautak bakah hun a duh rei thin.
Tlawng lui nut chhan hmuchhuak
