Aizawl chawmtu Tlawng lui, Greater Water Aizawl Supply Scheme Phase I leh II chu Inrinni khan MNF Thalai Hqrs hruaituten an tlawh.
Mizoramin Cyclone Remal siper a dawn avanga chhiatna thlengah Aizawl khawpui chawmtu tui pump-na chu tui lianin bawlhhlawh leh hnawl tam tak a len telte nen a khawl an tihchhiat phah a, tun thlengin dan pangngai angin tui pump hleihtheih ala ni loa, khawl siamthat ngai pawh a la awm tih PHE hotute chuan an sawi.
MNF Thalai vice president Lalnunmawia Pautu chuan, department leh thawktute sawisel turin an kal lo a, Aizawl khawpuia chhungkaw tinin tui in tur thianghlim tam zawk an dawn thuai theihna’n hmalakna leh hmasawn zelna tur thiltha a awm beseia a hmuna en an ni tih a sawi.
Cyclone Remal-in Mizoram a nuai hma leh a nuai hnuah Aizawla tui harsatna chungchang auchhuah pui an tum mek laiin, furpuiin a nang zui a. Cyclone Remal in khawl a tihchhiat hlimin sawrkar thuneituten thlakhat chhunga a pangngai anga tui sem theih an beisei laiin, thla khat chuang hnu ah pawh harsatna a la awm belh zel chu pawi an ti, tih a sawi.
PHE department thawktuten chhunzan zawmin tui hnianghnar kan neih thuai theih nana hna an thawk chu ropui an tih thu a sawi a. Mi harsa zawkte tawrh theihna tur chhiah lak leh bill tihsan kawngah sawrkar a hmanhlel hle laiin, mi hausa leh retheiten rualkhai taka tui hnianghnar kan hmuh theihnan sawrkarin a tih tur a ti tawk lo ah an ngai tih a sawi bawk.
PHE hotute chuan GAWSS-I hian a hmain nitin tui litre maktaduai 10.8 a pump chhuak a, GAWSS-II in maktaduai 24 a pump chhuak thin a. Khawl a chhiat tak hnu ah litre maktaduai 13.89 chauh a pump chhuak thei ta a. Hei hian nasa takin Aizawl khawpuiin tui mamawh a hmu loa, harsatna a thleng ta a ni.
An tlawh lai hian Tlawng lui tui nut zawng hi tui thianghlim tehna (Nephelometric Turbidity Unit) 500 vel a ni a. Ei in tlak – NTU 5-a ti thianghlim turin tui a nu nasa a, hna thawh chak a har a. Hei hian tui pump kawngah harsatna a thlen nasa hle tih MNF Thalai hruaitute hi an lo hrilh.
Tlawng luia tui pump-na tlawh
