Tunlaiin Tlawng tui a nu a, lak tlak loh khawpin a
nu. Inrinni leh Chawlhni vel khan a zia deuh a, mahse tui hi sem tur a la tam rih lo.
PHE department hotute sawi danin, Aizawl tui tlan Tlawng tui hi ni khatah litre maktaduai 30 vel an pump-in hnianghnar khawpa sem tur a tling lo deuh a, tun hnaiah nut avangin an pump tlem thei hle. June ni 14 khan litre maktaduai 29.46 an pump a, hemi ni atanga ruah a sur khan tui hi a nu ta a, tui an pump hnem thei ta lo.
An chhinchhiahnaa a lan danin, ni 15-ah litre maktaduai 20.56 an pump a, ni 16-ah litre maktaduai 6.96, ni 17-ah litre maktaduai 15.86, ni 18-ah litre maktaduai 19.29 an pump. Heng hi Aizawl mipui tan a tlem hle.
Chawlhni khan tui hi a fim ta deuh a, a tuk lam dinhmun erawh hriat a ni rih lo.
Tui fim dan tehna Nephelometric Turbidity Unit (NTU) an tihah Tlawng tui hi NTU 500 te, NTU 600 te a ni fo a, chung chu an pump hnuah tifimin NTU 5 aia sang lo a nihin an sem thin. Tun hnaiah Tlawng tui hi NTU 100 chuang a ni thin a, NTU 1500 te a tling thin. Chawlhni-ah chuan hei hi a tlahniam.
PHE department atanga thu dawn danin, tun hnai ni hnih khat vel chhung khan tui hi tlemin a fim ta deuh a, Chawlhni phei kha chuan a hma ngaihtuahin a fim fu. Tui nut lam hi a danglam chak a, zing lam leh chawhnu lam dinhmun te pawh a inang lo zeng zung thei. Chuvangin a fim mar a ngai a, chumi tur chuan lui hi dim a ngai, PHE department hotute chuan an ti.
Tlawng lui tinute hi leivung leh bawlhhlawh a nih thu an sawi a, Tlawng leh a fintu lui velah leivung leh bawlhhlawh paih thin an awm avangin tui hi a nu thin an ti.
Tlawng tui a zia deuh, tui erawh la ngah lo
