Police department-a hnaruak 4000 chuang awm chu sum awm dan aizirin tlem tlema hnawhkhah chhoh tum a ni tih Home minister K Sapdanga chuan a sawi a. Mizorama jail ho pawh thawmthatna tur an dil mek tih a sawi.
Assembly Session-a zawhna chhangin Home minister chuan police-ah post ruak 4268 hnawhkhah loh a awm mek a, department-in kalphung a neih angin hnawhkhah tumin inbuatsaih a ni a, process mek pawh awmin, sum dinhmun a that loh avangin tlem tlema hnawhkhah tum a ni tih a sawi.
Mizorama jail zawng zawng chu a awm thei tura ruahman zat aia a let deuhthawh an awm deuh vek tih sawiin, thawmthat leh tih len ngai vek a ni tawh tih a sawi a. SASCI hnuaiah cheng vaibelchhe 55 senna tur dil mek niin, hmuh ngei an inbeisei a, chumi chuan an thuamtha dawn tih a sawi bawk.
Police Station leh outpost-ah a thawktu mai ni lo, lirthei indaih lohna a awm a, a then phei chuan an nei lo tih K Sapdanga hian a sawi a. “Theih ang anga insem zai a, inthuamthat zel tum a ni. Lirthei hlui deuhte a thara thlak chhoh zel tum a ni,” a ti.
SASCI atang bawkin Police Housing Scheme atan cheng vaibelchhe 50 ruahman niin, Aizawl leh a chhehvelah cheng vbch. 25 hman phawt a ni anga, Lunglei leh a chhehvel ah kalpui leh a ni dawn tiin, zawhna a chhang a ni.
Tlem tlemin police inlak tum Jail thawmthatna tur dil mek
