Pathianni zan khan English Premier League (EPL) khelh chhunzawm a ni a, Manchester Derby hmuhnawm takah tlem zawk ni chungin Manchester City chuan Old Trafford-ah ngei Manchester United an hneh. Pathianni zana inkhel dangah Brighton chuan 5-0 ngawtin Conventy City an sawp ve thung.
United an lawm hmasa
Old Trafford-ah Manchester United leh Manchester City te inhmachhawn tur hian ngaihven a hlawh a, ngaihven a hlawh ang ngeiin inkhel hmuhnawm tak pawh a ni. An mualah United an lawm hmasa a, minute 23-na atanga tam zawk an nih vangin an mualah chak theihna hun tha tak an nei. Hun tam zawk tam zawk ni chungin inlan bawk mah se tlawm zawkah an tang tehtlat a, a lawm hnuhnung zawk leh lawm rei zawk chu City an ni.
Manchester derby hmuhnawm tak hi boruak a tang at a, mikhual team City in ball chang tam zawk mah se goal thun theihna hun tha an insiam thei bik lo. Goal thun tuma an innawr tawn chhen laiin City midfielder Phil Foden chuan a tinbutut a sum zo lova, amah pet luitu Bruno Fernades chu tlu chungin a tlawh let. United captain Bruno Fernandes hi buaina bul tantu zawk ni bawk mah se fim lo zawk Foden hi inkhel thununtu Michael Oliver chuan inngaihtuah buai map lovin Red Card a hmuh a, hnawtchhuak. Foden hnawhchhuah a ni a, Fernandes hi Yellow Card em pawh pek a nih ve si loh vangin City player leh an mahni tantute an lawm lo hle
A lawm rei zawk chu City
Minute 23-na lekah an player pawimawh Phil Foden hnawchhuah a nih vangin Manchester City dinhmun a chhe hle a, an hmelma lian United lakah tlawm ngei tura ngaih an ni hman. Tlem zawk an nih vangin tlawm tura ngaih ni bawk mah se mak tak maiin City an khel tha zui em em a, tlem zawk ni chungin United lakah ball chang tam zawk an la ni thei cheu a, goal thun hmasa zawkah an tang ta hial. Defender Josko Gvardiol ball vawrh luh chu goal hmaa hlauhawm bik Erling Haaland chuan pui zetin a pet goal. Haaland hi offside anga ngaih a ni hman zet a, VAR rawn a nih hnuin a lo offside lo hlauh a, a goal thun pawmsak niin City hma an hruai.
Tam zawk an nih chhawr tangkai ngei tumin United in tan an khawh a, an si phurh sut tumin theihtawp an chhuah. An si phurh sut theihna hun tha nei bawk mah se uiawm takin an chhawr tangkai zo lova, hre hle mah se tam zawk ni chungin an mualah ngei City ngam lovin an tlawm zui ta a ni.
VAR rawn a nih hnuin Haaland goal pawm ni bawk mahse pawm fel vek a nih hnu, inkhel tawp hnu lama ennawn a nihin Haaland hi a lo offside ngei tih hriatchhuah a ni zui leh a, United vanduai a kaltluang. Tam zawk an nih vangin United lawm hmasa mah se chak zawk an nih vangin lawm hnuhnung zawk City an lawm rei a zawk a ni.
Pathianni zana inkhel dangah Brighton & Hove Albion chuan Mimuala an khingpui Coventry City chu 5-0 ngawtin an sawp.
Tlem zawk ni chungin City an chak
