Tling lo na na na, tling anga pawm alh hi chu thil dik lo hul hual a ni. Khawvel hi thil pahnihah a inhen phawk a, chu chu — ‘Dik’ (tling) leh ‘Dik lo’ (tling lo). Bible-in min zirtir pawh heng thil pahnih ‘dik’ leh ‘dik lo’ thliar hranna hi a ni deuh ber a. A tawi zawngin, ‘Thihna’ leh ‘Nunna’; ‘hremhmun’ leh ‘vanram’. Tling leh Tling lo chu inthlau tak a ni.
Mizoram chhunga college hrang hranga assistant professor 29, danin a phut ang tlin lote chu, February 28, 2025 thleng chhawr chhunzawmna lehkha tih chhuah a nih khan, ‘hemi bak hi chu an thawh hun chhung pawhsei sak tawh loh tur’ tia thu delhkilh thlap a ni a; mahse, hun pek belhna notification a chhuak leh si a, zirlai pawlte an lungawi thei lo a, “quality education humhalhna kawngzawh” an huaihawt a. Sawrkar lamin a chinfel hun chhung atan ni nga chhung an tiam a, chu chu ngaihchan leh mek a ni ta a.
Tling lo tih hre reng chunga sawrkarin hun hei leh chen zirtirtu tling lo (unqualified teacher) te a ruai reng mai hi thil mak tak a ni. Aikal lak dan dik lo tak chingfel thei sawrkar tia hlado an chham mek laia a lehlamah hetiang thil a lo la thleng reng mai tih han hriat hian, zirtirtu atana danin a phut ang nei thei thlap mithiam rual hi Mizoramah hian an awm ta lo em ni ang? Zirtirtu hna thawk thei tling leh tlak an awm ngang lo a nih chuan, Mizoram zirna dinhmun hi a va ngaihtuahawm dawn ve le!
He thil thleng aang hian, kan ni tin khawsaknaa kan kalphungte pawh hi han keu chho den den ila, dik nge tam dik lo? Tling nge tam tling lo?
Ei kan zawnnaah, kan sumdawnnaah, hna kan thawhnaah, sawi tur a tam anga, kan sawi seng lo ang. Buk tling si lo buk tling anga lantir, thil man (MRP) bel hnana mahni thua thil man lo ziak ve mai te, sawrkar office ni se, a tam mai.
Kristian ram tia chhal hin kan ni a, Kristiante chu Dikna nunpui tura ngaih kan nih laia Dikna ber rahbeha a awm zawk tlat chuan, leia kan dam chhung la la pawhin heti hian kan buai reng ang a, khawvel piah lamah pawh kan la buai zui zel dawn tihna chu a ni mai a. Inenfiah hi chu kan mamawh tlang a nih hmel
