Trinamool Congress (TMC)-a hel MP 20 vel chuan Pathianni khan Lok Sabha Speaker Om Birla hnenah Tripura-a party hriat hlawh lo tak nen an inzawm tih an sawi a, hei hian National Democratic Alliance (NDA) thlawptu a tipung dawn a. He thil thleng hi India parliament chanchina inhnuhdawh lian ber zinga mi a ni thei dawn bawk.
TMC MP 20 vel hian Pathianni khan Birla hi an hmu a, lehkha an thehlut a, Nationalist Citizens Party of India (NCPI) nen an inzawm tih an sawi a. An party zawm hi kum 2022-a din kha niin kum 2023 inthlanpui kha an chuh ve a ni.
Tunah hian an party hian ram chhung khawiah mah MP an nei lo va. Lok Sabha-a hotu pakhat chuan Birla hian MP 20-te hming hi an insuih zawm tih a pawm hmain a finfiah dawn tih a sawi.
“Keini MP 20 vel hi tunah hian NCPI nen kan inzawm ta a, Prime Minister Narendra Modi-a leh Amit Shah te kaihhruaina hnuaiah NDA nen kan thawk dun dawn a ni,” tiin hel MP Kakoli Ghosh Dastidar-a chuan Birla an hmuh zawhah a sawi.
Helho leh Birla inhmuh hi party hotu, Mamata Banerjee-i laka rinawm MP pahnih, Sagarika Ghose leh Kirti Azad ten speaker an hmuh hnuah a ni a, TMC Lok Sabha floor leader Abhishek Banerjee-a lehkha an hlan a. Lehkhaah hian ‘Tenth Schedule hnuaiah inthenna a awm tawh lo’ tih leh TMC chu ‘political party pakhat, inthen theih loh’ a nih thu a tar lang bawk.
Hel lamin NCPI an zawmna hi pawm a nih chuan Lok Sabha-ah BJP kaihhruai tangrual, NDA chakna chu 294 atangin 314-ah a pung dawn a, rorelna in hniam zawkah hian hmun thuma thena hmun hnih chang turin seat 46-in a la phak dawn lo va. Rajya Sabha-ah chuan seat 155 an tling thei dawn a, hmun thuma thena hmun hnih an tling lo deuh bawk ang.
Pathianni tlaia Birla hmuhnaah hian TMC MP 19-te chuan NCPI zawm an duh thu lehkha an hlan a. A vawi khat nana MP, tuna Malaysia-a awm mek, Rachana Banerjee pawhin lehkhaah hian a remtihna a pe a, 20 awmna pawl a ni ta a ni.
TMC buaina hi thla hmasaa assembly inthlanpuia BJP lakah an chak loh hnua thleng niin Bengal-ah hian MLA 59 chuan assembly-ah Ritabrata Banerjee-a chu Leader of Opposition (LoP)-ah dahin pawl hrang an din tawh bawk.
Hmeichhe quota leh delimitation kalpui dan tur constitution amendment bill hnehna kawngah hmun pawimawh tak changtu, TMC hi inthen darhna hi a kal zel a nih chuan rorelna in hniam zawkah seat pariat chauh an nei tawh dawn tihna a ni a. Rajya Sabha-ah pawh 13 atangin 10-ah an thla bawk ang.
TMC chak lo hi eptu tangrual, INDIA-in parliament-a BJP a do let theihnaah pawh nghawng a nei dawn a. TMC-a thil thleng hi Rajya Sabha-a Aam Aadmi Party (AAP)-a helna a chhuah atanga kar eng emaw zatah a ni bawk.
April thla khan AAP MP hel, Raghav Chadha-a leh MP dang paruk chuan AAP chhuahsanin BJP an lo zawm tawh bawk a ni.
TMC MP helten party lar lo NCPI zawm, NDA thlawp
