BJP MP Nishikant Dubey chuan Trinamool Congress MP Mahua Moitra chu Adani Group leh Prime Minister Narendra Modi beih nana sumdawng Darshan Hiranandani hnen atanga thamna lain Parliament zawhna a zawt a ni, a ti a. Hei vang hian Trinamool MP chu suspend nghal turin a ngen bawk.
Hetih lai hian Mahua Moitra chuan amah chhui chu engtikawng zawng pawhin a pawm vek tur thu a sawi nghal thung a.
Hiranandani Group-te pawhin puhna chu na taka an hnawl nghal thu sawiin engmah thatna nei lo an ti bawk a. “Sumdawnnaa inhnamhnawih kan ni a, politics business-ah erawh kan tel ve lo. Ram tan kan company chu sorkar nen kan thawkho reng a, kan ti chhun zawm zel ang,” tiin Hiranandani Group thupuangtu chuan a sawi bawk a. Hiranandani Group-te hian infra contract chu Adani Group te lakah an hloh a, hei vang hian Moitra chu zawhna an zawh tir ta a ni, tiin Dubey chuan Birla hnena lehkha a thawnah a sawi a.
Hiranandani-te chuan Moitra hnenah hian Rs 2 crore mai bakah i-phone te pawh an pe a, inthlana a chuhna turah Rs 75 lakh an pe tiin a sawi bawk.
Kum 2019 atanga 2023 inkar chhung khan Moitra in zawhna 61 a zawha sawmnga lai chu Darshan Hiranandani te aiawha a zawh a ni, tiin Dubey chuan a sawi bawk a. Moitra hian sumdawng hi a Lok Sabha account pawh pein chutah chuan Moitra aiawhin Hirananda chuan zawhna a zawt thin a ni tiin a sawi bawk a. Chungte chu advocate Jai Anand Dehadrai-a’n a chhui chian vak hnuah hriatfiah a ni a ti bawk a, CBI pawh hrilh an ni tawh a ti bawk.
TMC MP Mahua Moitra thamna laah puh
