Tom Holland-a’n Zendaya nen an innei tawh tih a puang
Hollywood star, Spider-Man changtupa Tom Holland chuan Spider-Man film-a a chanpui Zendaya nen an innei tawh tih a rawn nemnghet ta. Zendaya stylist Law Roach chuan thla thum kalta khan heng Hollywoos star pahnih te hi an innei tawh niin Actor Award-ah a sawi chhuak a, hemi hnuah pawh hian Tom leh Zendaya hi an la ngawi zui tlat a, tunah chuan Tom hian a rawn nemnghet ta a ni.
Esquire magazine-in an kawmnaah AI hmanga an inneih thlalak an siam darh ta chungchang an sawi chhuak a, chanchinbu lam chuan he AI thlalak avang hian Tom Holland-a pi chuan mo lawmnaah an sawm ve lo ni a inhriain a lunghnur niawma thuthang te chu an sawi chhuak a, chutiang thil chu a thlengin AI thlalak avanga an chhungte leh thiante bum an awm reng em ni, tia an zawh hnuah Tom Holland chu a ngawi deuh vang vang a, “Chutiang a awm lo, an vaiin an tel vek alawm,” tiin an inneihnaah an chhungte leh thiantha te an tel vek thu a puang ta a ni.
Mahse, Tom hian an inneih dan vel boruak erawh engmah a sawi zui duh chuang lo a, “Kha bak chu engmah ka sawi belh dawn lo,” a ti zui nghal zat a ni.
March thla khan Zendaya stylist Roach chuan Actor Awards semna red carpet-a Access Hollywood-in an kawmnaah Tom leh Zendaya te chu an innei daih tawh ni a sawiin, “An innei daih tawh. In hre lo mai mai anih kha,” a ti a, a kawmtu lamin an awih vak lo niawma an zawh nawn leh pawhin, “Thudik a ni e,” a ti a, heta tang hian Tom Holland leh Zendaya te hi an innei tawh niin thu a thang zui ta a, mahni anni pahnih hian official-in engmah an puang duh lo a, tunah chuan Tom hian an inneih tawh thu hi a rawn nemnghet a ni.
Tom Holland leh Zendaya te hi 2016 khan Spider-Man: Homecomming an chan dunna atanga intawng an ni a, he film-ah hian Tom chu Spider-Man lemah changin, Zendaya hi a ngaihzawng Mary Jane lemah a chang a, January 2025 khan inhualin, tunah chuan nupa an ni ta a ni.
Tom Holland-a’n Zendaya nen an innei tawh tih a puang
