Tualte Tomato Processing Unit chu nimin khan deputy chief minister Pu Tawnluia chuan a hawng ta a. Mizorama tomato sawngbawlna din theihna khawp tomato kan tharchhuak ve ta hi, kuthnathawktute an fakawmin an chhuanawm a, anmahni chhawmdawltu sawrkar lam pawhin fak a phu e.
Tualte khua hian kum 2019 atangin tomato an ching tan a, chhungkua 200 chuangin eizawnna’n an hmang mek a. Kum 2019-2023 chhung hian tomato atangin cheng nuai 1193 chuang an lalut tawh niin sawrkar thuchhuahah chuan tarlan a ni a. Tualte khua bakah hian Mizorama khaw thenkhat atangin tomato hi thahnem tak thar chhuah a ni ve bawk a. State pawn atanga tomato chaw lut ngar ngar thin Mizoramin tualchhung tharchhuah tomato atanga hetiang zat sum a hailut ve ta hi hmasawnna kawng khat chu a ni phawt mai.
Hetih lai hian, Tualte tomato atanga sum lakluh hi a hlawm chuan a thahnem hlein a lang a, mahse a thawkchhuaktu chhungkaw zat 200 chuang tih hi, 200 anga chhut pawhin kum nga chhunga chhungkaw tinin tomato atanga sum an lakluh hi chawhrual chuan thla khatah cheng 9940 ang a ni a. Chawhrual a nih miau avangin thenkhatin a nuai tel an lakluh laiin, a sang bi emaw chauh la lalut pawh an awm dawn tihna a ni.
A chhiarkawp atanga chhut chuan hlawk thur thurna tur chu a la awm rih lo pawh a ni mai thei, mahse tun hi a bultanna chauh a la ni a, processing plant a awm tawh phei chuan tomato tawih ral mai mai tur pawh sumah chantir theih vek a ni tawh dawn a, tomato chingtu pawh an pung zel ang a, nakin lawkah chuan kan lakluhna thin state dangte pawh hian an la rawn la ve zawk ngeiin a rinawm.
Kuthnathawktute tana hmasawnna thar hmuh tur a awm chho mek hi a lawmawm a, state dang tih ang hi kan ti thei ve a ni tih hre thar chung zelin, ‘kan ti thei ve’ tih hi thuvawnah hmang ila, kar lovah hma kan sawn zawt zawtin a rinawm a ni
Tomato atanga sum lakluh
