December 7, Pathianni zan khan English Premier League 2025-26 khelh chhunzawm a ni a, season kal meka khel tha pangngai tak Crysak Palace chuan Fulham hnehin top 4 huangah an inhlangkai. Palace an chak lai hian Brighton & Hove Albion chu an mualah an tlawm teuh viau thung a, hun pek belha Georginio Rutter goal thun hmangin West Ham United lakah tlawm an pumpelh theih hram a, point khat hlu tak an hmu.
Team khawng Crystal Palace
FA Cup final-ah Manchester City hneha an champion nawlh hnuin Crystal Palace hi team khawng tak an ni chho a. English Premier League champion Liverpool hnehin Community Shield an chawi zui leh bawk. Oliver Glasner lakah Eagles an vul chho viau. Europa League khel tur ni bawk mah se club neitute vangin Europa Conference league an khel ta zawk a, European competition beisei angin khel tha lo mah se last 16 lut thei dinhmunah an la ding. Europa Conference League-ah beisei phak chiah lo mah se English Premier League-ah bul an tan that ber hun an tawng ve thung a, Glasner hnuaiah team khawng tak an ni chhunzawm zel.
Team khawng tak Palace hi Pathianni zan khan Fulham hmachhawn turin Craven Cottage-ah an leng lut. Mikhual an nihna mualah 2-1 in hnehna an chang a, point thum hlu tak an hmu. Fulham laka point thum an hmuh hmangin top 4 huangah an inhlangkai a, season tharah European competition khelh phak tumin tan an khawh zui nasa hle ngei ang.
Palace hian mikhual an nihna hmunah bul an tan tha a, goal thun hmasa zawkah an tang. An khingpuite mawi taka an kat kual hnuin Eddie Nketiah chuan box chhungah fuh takin ball a dawng a, chiang zeta Fulham tlarhnung a bum hnuin lei hrulah a pet goal a, minute 20-naah hmahruaina goal a thun. Mikhual an nihna hmunah goal thun hmasa zawk an nih vangin an phur a, inrintawkna sang zawk nen an inlan zui thei a, inkhel hmuhnawm an lantir.
Goal an chhuah hnuin mualneitu Fulham in na takin an mikhualte an nawr zui nghal. Chiang taka Palace tlarhnung an thiah hnuin
Emile Smith Rowe chuan goal a thun teuh hle a, Palace si nghak Henderson chuan pui zetin a save a, an team a chhanhim. Vanneihthlak takin him bawk mah se an him rei lo thung. Mualneitu Fulham in hun tha an nei zui leh nghal zat a, Harry Wilson chuan minute 38-naah goal thunin an si phurh a sut. Wilson goal thun hnu hian goal dang a luh belh thei tawh rih lova, 1-1 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal thun tumin an innawr tawn nasa hle. Fulham in goal an thun hmasa zet a, offside vangin an goal thun hi hnawl a ni hlauh thung. An him hram hnuin Crystal Palace in a tawp an khar tha a, hun tawp dawn hnaihah chakna goal an thun. Corner atanga ball kal chu captain Marc Guéhi chuan minute 87-naah chiang zetin a tauh goal a, hma an hruai nawn lehna goal a thun. Guehi goal thun hi Fulham in an sut thei tawh lova, Crystal Palace chuan mikhual an nihna hmunah 2-1 a hnehna hlu tak changin point thum an hmuh belh.
Fulham laka point thum an hmuh nen Palace hian khelh 15 atangin point 26 an hmu a, palinaah an inhlangkai. EPL ah hian khelh hmasa 15 atangin hetiang zat point hi Crystal Palace hian an la hmu ngai lova, EPL-ah bul an tan that ber tum an tawng mek. FA Cup leh Community Shield lakpuitu Oliver Glasner hnuaiah Palace an khel tha chhunzawm a, team hmuhnawn leh dehkhirh tak an ni mek. Pali-naah Palace an awm laiin Fulham hi 15-naah an awm ve mek thung.
Brighton an him hram
Pathianni zana inkhel dangah Brighton chu an mikhual West Ham hneh lovin an tlawm teuh hle a, hun pek belha goal an thun hmangin tlawm an pumpelh thei hram. Table hnuai lama awm West Ham United tan hian Jarrod Bowen chuan minute 73-naah hmahruaina goal a thun a. Brighton tan Georginio Rutter chuan minute 90+1-ah a sut thei hram.
Top 4 huangah Crystal Palace
