Exam-ah result tha kan nei thin chungin, kan zir dan phungah exam ringawt erin kan inzirtir thin em, tih enchian a ngai tih chief minister Lalduhoma chuan a sawi.
School Education department chuan HSLC & HSSLC 2024 Exam topper-te hnenah Ningani khan Chief Minister’s Award a hlan a. Hmanpuitu chief minister chuan topper-te chu lawmman dawng thei khawpa an hlawhtlin chhan chu an taimak vang a ni tih a sawi a. Rev Dr Zairema’n sikul tha chu headmaster an tha tihna a ni, tia a sawi thin thu sawi chhawngin, sikul enkawltu tha an nei tihna a ni tel tih a sawi. “Result tha tak tak nei chho zel mah ila, kan zir dan system hi kan inenfiah deuh a ngai niin a lang. Central competitive exam-ah kan tling hleithei loa, exam ringawt erin kan zir thin em ni aw tih theih,” a ti.
School Education minister Dr Vanlalthlana chuan, intihsiakna a nih tawh chuan mi tlemte zingah pawh a ber nih a har a. Zirlai sing chuang zinga a titha ber an ni chu a ropuiin, an hlawhtlinna phenah thawhrimna leh tumruhna a hmuh theih a, chu chu a entawntlak a, a ngaihsanawm, tiin a sawi. Zirlaite zingah communication skill leh leadership lam inzirtirna uar deuh deuh tha a tih thu a sawi bawk.
He award hi School Education department hian kum 11 a lo kalpui tawh a, quality education a awm theih nana sawrkar policy pakhat niin, senso tur pawh budget-a dah sa a ni. Chawimawina hian thuziak leh sumfai Rs. 50000 a keng a ni.
Chawimawina hlan te:
HSLC topper Lalmoipuia Lawmzual St. Paul’s HSS
HSSLC topper (Arts) Linden Lalremruatpuia Oikos HSS
HSSLC topper (Com) David Lalhminghlua St. Paul’s HSS
HSSLC topper (Sc) Lalramdina Ralte St. Paul’s HSS