August 29, Thawhleh zan khan Carabao Cup round 2 khelh a ni a, London club lian Tottenham Hotspurs chu Fulham hneh lovin an mualpho a, round 3 lut zo lovin an tla. Inkhel dangah championship club Leeds United chu League 2 team Salford City hneh lovin an mualpho ve bawk.
Manager thar Ange Postecoglou hnuaiah EPL 2023-24-a bul tan tha Tottenham hian Craven Cottage-ah EPL-a an elpui Fulham an luhkhung. Fulham nen hian hun pangngaiah 1-1 a an inhnehtawk hnuin penalty shootout-ah Spurs hi vanduai zawkah an tang a. Carabao Cup atangin an puanthuah an tel mai a ngaih phah.
Fulham hian an mikhual London club lian lakah bul an tan tha a, minute 19-naah Tottenham player Micky van de Ven-a’n an lamah a tih goal hmangin hma an hruai. Minute 19-naah goal an hlawhchhuah hmang hian second half tir lam thlengin hma an hruai. Tottenham hian hma taka goal an chhuah sut ngei tumin tan an khawh a, chawlhlawk hmain goal an thun thei lo. Chawlhlawk hnu lamah bul an tan tha a, goal an thun ta thuai thung. Minute 53-na lekah Ivan Peresic siamsak atangin Richarlison chuan goal a thun a, an si phurh a sut.
Goal khat ve ve an thun hnuin inkhel a hmuhnawm zui viau a, goal thun tumin tan an khawh dun nasa hle. Goal thun tuma an inawr tawn chhen chungin goal an thun belh thei lo ve ve a, penalty shootout hmangin round 3 lut tur zawn zawn chhunzawm a ni. Penalty-ah hian Tottenham tana pettu pathumna defender Davinson Sánchez pettu chu Fulham si nghak Marek Rodak chuan a dansak. Hemi hnu hian Fulham tana pettu pahnih; João Palhinha leh Kenny Tete ten an pet goal ve ve a, team lian Tottenham chu 5-3 a hnehin round 3 an inhlangkai zui ta a ni.
Thawhleh zana inkhel dangah Championship club Leeds United chuan championship hnuai, hnuai leha awm League Two team Salford City chu Peninsula Stadium-ah an hmachhawn. Leeds hian hun pangngaiah an si phurh sut thei bawk mah se penalty shootout-ah vanduai zawk an ni a, Carabao Cup atangin an puanthuah tel mai a ngaih phah.
League Two team Salford City in team lian zawk Leeds United lakah bul an tan tha a, minute 34-naah Matt Smith chuan hmahruaina goal a thun a, he goal hmang hian minute 75 thleng hma an hruai. Hun rei tak si an phurh hnuin hun tawp dawn hnaih minute 76-naah Pascal Struijk chuan Leeds United tan goal thunin, an si phurh a sut a. Hun pangngaiah goal thun thei an awm tawh lo ve ve.
Hun pangngaiah 1-1-a an inhnehtawk hnuin penalty shootout hmangin chak zawk zawn chhunzawm a ni a, Salford City hian 9-8 a hnehna changin, round sang zawk an inhlangkai. Penalty-ah hian Leeds tana pettu pathumnaa Georginio Rutter chuan a thelh a. Salford in chak theihna hun tha an neih laiin a panganaa pet Connor Mclennan chuan a thelh ve leh ta tlat a, chak zawk an awm thei rih lo. Salford tana pettu ten an pet goal zel laiin Leeds tana pet hnuhnung ber Jamie Shackleton-a’n a thelh vangin Salford City in hnehna lian an chang ta a ni.
Thawhleh zana inkhel dangah EPL club Norwich City in si khat faiin Bristol City an hneh hram a. Hun pangngaiah an chak zawh loh hnuin Brentford in Newport County chu penalty shootout-ah 3-0 in an hneh hram a, mualpho an pumpelh. Hetihlai hian Crystal Palace chuan Home Park-a an khingpui Plymouth Argyle chu 4-2 a hnehin, round 3 an inhlangkai ve thung.
Tottenham an tla nghal
