Inrinni zana English Premier League khelah London club lian Tottenham Hotspurs in hnehna an chan laiin Chelsea erawh chu Nottingham Forrest hneh lovin an tlawm ve thung. Chelsea rual hian club lian Newcastle United pawh Brighton lakah an tlawm ve bawk.
Tottenham hian an lenluhna mual Turf Moor-ah bul an tan tha lova, goal an chhuah hma hle. Inkhel tan atanga minute lina lekah Lyle Foster chuan Burnley hmahruaina goal a thun nghal. He goal hian Tottenham a chhaih kawlh ta hlauh a, goal nga ngawtin an khingpuite an chhang let.
Hma taka goal an chhuah hi minute 16-naah Son Heung-min goal thun hmangin an sut phawt a, minute 45-naah Cristian Romero goal thun hmangin hma an hruai let hman a, 2-1 a hmahruai chungin chawlhlawk an hmang.
Chawlhlawk hnu lamah Spurs an khel tha chhunzawm zel a, minute 54-naah Leicester City atanga an lak James Maddison chuan an goal thumna a thun. Maddison hi a club thar Tottenham tan a khel tha viau a, an chakna hnar pawimawh tak a ni. 3-1-a hma an hruai hnu hian captain Son Heung chuan minute 63 na leh 66 naah goal thun zawnin hattrick a siam. Mualneitu Burnley tan minute 90+4-ah Josh Brownhill chuan goal thunin an si phurh a sut then naa goal dang an thun belh thei tawh lo.
Season liam taa chetha, champions league hial khel phak Newcastle United chuan season tharah bul an tan tha lova, Inrinni zana an khingpui Brighton & Hove Albion lakah 3-1 ngawtin an tlawm zui leh. Brighton in an mikhual Newcastle United laka goal thum an thun hi Evan Ferguson thun vek a ni.
Rawlthar kum 18 mi Feruguson hian minute 27-nah an hmahruaina goal a thun a. Minute 65-na leh minute 70-naah an goal a thun belh leh bawk a, EPL-ah a vawi khat nan hattrick a siam. EPL-ah hian kum 19 tlin hmaa hattrick siam thei pali chiah an la awm a, chungte chu Chris Bart-Williams, Robbie Fowler, Michael Owen leh Evan Ferguson te chiah an ni.
Brighton hian nipui bazar laiin an midfielder pawimawh pahnih Moises Caicedo leh Alexis Mac Allister te an ch^n a, an mual lai a ruak deuh huai. Heti chung hian season tharah an chetha rih viau thung a, vawi li khel tawhin vawi thum an chak a, point kua hmuin table-ah palina an ni mek. Brighton an chetthat laiin Newcastle United erawh chual bul an tan tha lo viau thung a, vawi li khel tawhin point thum chiah an la hmu.
Tottenham leh Brighton ten hnehna an chan laiin Club lian Chelsea erawh an buai chhunzawm thung a, nipui bazara sum seng hnem Blues hian Stamford Bridge-a an mikhual Nottingham Forrest chu si khat faiin an hneh lo ringawt.
Team lian Chelsea lakah Nottingham Forrest chakna goal hi minute 48-naa Anthony Elanga thun a ni a. Manchester United atanga an lak Elanga hian a club thar tana a goal thun hmasak ber hmangin team lian Chelsea lakah point thum hlu tak a hmuhpui.
Season liam taa beisei phak lo Chelsea hian season tharah pawh beisei an phak lo chhunzawm a, khelh li atangin point li chiah an la hmu. Nipui bazar laiin sum an seng hnem nasa mai si a, an insiamtha thuai a nih loh chuan manager Mauricio Pochettino-a’n ban a tawh thuai a rinawm
Tottenham leh Brighton an chak, Chelsea an tlawm
