Tourism hmunhma cheithat tur en
Aizawl leh a chhehvela khualzinte dawnsawnna leh an tlawh duh tur hmunhma cheithat tura ruahman thlirin Tourism minister Lalnghinglova Hmar chuan a tlawh kual a. Department hotute leh heng hmun awmna khawtlang hruaitute nen an enho.
Tourism minister chuan, Mizoram hmun hrang hranga tourism potential nei tha hmun engemawzat chu cheithata tihchantlun tum a ni tih a sawi a. Sawrkarin a cheithat dan turah ruahman sa deuh nei mah se, a hrechiangtu khawtlang hruaitute rawtna leh duhdan ngaithla a, a tha thei ang ber neih tuma remruat ho tura kalchilh an ni tih a sawi. Hmunhmate chu khuarel mawina tichhe lo thei ang bera cheithat tum a ni tih a sawi bawk.
“Hmasawnna ruhrel sak engemawzatah a enkawl leh hman dan turah ruahmanna a awm that tawk loh thin avangin infrastructure tha tak tak pawh enkawltu mumal awm loa tawl chhia a awm thin. Tuna kan project turah hi chuan a sak lai leh enkawl chhunzawm kawngah khawtlang nen tha taka thawhho kan duh a, ziaka inremna mumal tak neih hmasak kan duh a ni,” a ti.
Aizawl leh a chhehvel – Sakawrhmuituai tlang, Durtlang North, Sakeikhawthlir (Durtlang), Muthi leh Laipuitlang-a hmunhma an tlawh a, khawtlang hruaitute nen hmalak dan tur ruahman a ni.
Mizorama tourist site cheithatna tur hian SASCI Part-II 2025- 2026 hnuaia ‘Development of Tourist facilities & attractions to Global Scale in the state of Mizoram’ ah cheng vaibelchhe 250 hmuh a ni tawh a. Hemi hnuaiah hian tourist site hrang hranga hmasawnna ruhrel siam bakah tourist lodge pawimawh bik cheithat, wildlife sanctuary behchhana wildlife tourism kalpui, water sports adventure hmun tur siam, paragliding thlawhna tur siam a tel.
Tourism hmunhma cheithat tur en
