Tourism department-in project an kalpui mek leh hmachhawp langsar zual tun hnaia an rawn pho chhuahte han hmuh hian, tunhmaa tourist lodge sak tluk tluk era kha kan kal pel tan ve ta niin a lang. A khaikhawm nan chuan, tourism-in a kawng zawh tur dik a zawh tan ve ta, a tih theih ang.
Tunhma atang tawhin state economy chawikang thei tur ‘potential’ kan neih that zingah ‘tourism industry’ hi sawi hlawh berte zinga mi a ni thin a, chuti chung chuan hma han lak ngaihna vak kan hre lo. Mi vengva chin, sawrkar laipui mi pawimawh, Mizoramin khuallian kan lo thlen thinte reng rengin Mizoram an hmuh dan an sawi chhuah zinga hmun luah sang ber pakhat chu, ‘in ram boruak a nuam a, a mawi a, tourism lamah potential tha tak in nei’ tih te, ‘biodiversity hotspot huam chhunga in awm hi in vannei..’ tih te a ni thin. Kan vanneih dan pawh keimahni zawk hian kan hrethiam lo va, kan chhut ngai lova, mi chinchang hre zawk ten ‘in vannei’ min tihna pawh ‘in vannei min ti’ tiin kan hawi liam vel mai mai thin a nih kha.
Tunah chuan social media te a lo chak ta bawk a, khualzinmiten kan ram hlimthla hmuhnawm tak tak an vawrh darh a, midangin a hmuna rawn chen(enjoy) ve an chak a, rel a lo lut ta bawk nen, khualzinmite an rawn in-pang-aw-zial tup tup a, tourist-te hian tourism hi min promote-sak a ni ta ber a, kan vannei phian mai.
A lo dawngsawngtu lam kan lo chet ve vat vat hi a pawimawh a, chumi atan chuan tuna tourism department-in hma thar eng eng emaw a han la ta hi Mizoram tourism tan ‘bung thar’ tia sawi theih a ni ve awm e. |an han la sauh sauh se, mipui pawhin theih ang anga kan thlawp a, kan tanrual a pawimawh dawn hle a ni.
Tourism buaipuitute hian a ngaihna an hria; chutih rual chuan, ‘quality maintenance’ lam hi kan lo kal-kan (skip) palh hlauh ang tih a hlauhawm. Chung zingah chuan ei leh in lam hi pakhat chu a ni awm e. Khaw-kar kawng dunga restaurant leh hotel te hi tun aia ‘quality’ zawka kan cheibawl a pawimawh dawn. Ei leh in thianghlim taka sawngbawl dan hi kan inzirtir a la tul viau niin a lang a, he lamah hian beihpui thlak ve a tha khawpin a rinawm.
Khualchhawn lamah pawh tan kan lak chu a ngai. A bikin kan transporter-te hi Hindi leh English tawng tlanglawn chin hi chu inzirtir mai a tha awm e. Thawkkhat lai khan, traffic lam hian hnam dang lirthei khalhtute lo chiau-au-na tur Hindi (roman script) booklet an siam a, an tangkaipui viau kha. China pawhin Olympic (2008) an thlen dawn khan tawng zirna (foreign language campaigns) an lo nei a, tun thleng hian hma an sawn phah ta niin an sawi nghe nghe.
Tourism lamtluang a dik \an…
