Khaw kar kawnga khualzinte chaw eina dawr hotel leh restaurant tam zawk hi chu thianghlimna leh faina lamah an la hniam hle a. Ram chhung leh ram pawn atangin Mizoram tlawhtu khualzin an tam ta a, eitur sawngbawl leh chhawpchhuah kawngah tun aia fai leh thianghlim zawk kan kalpui loh chuan, khualzinten ‘Mizoram chu a mawi, boruak pawh a nuam, mahse, an eitur siam dan a thianghlim lo” te hi min ti palh ang a, kan thang mawi lo zui viau zel ang tih a hlauhawm.
‘Inkalpawhna (connectivity) a that hian, hmasawnna pawh a chak’ tih hi a dikna kan hmu mek. Rel kawngin Sairang a lo thleng a, khualzin an pung thur thur a, eizawnna kawng hrang hrang a inhawng thar a, hun rei lo te chhung lek pawhin hmasawnna rahbi thar a piang nghal zut zut mai.
Hetih rual hian, eizawnna tluantling leh ngelnghet nei tur chuan ‘quality/standard control’ a pawimawh tih kan vawn reng a ngai dawn a. Tuna kawnglak chaw dawra eitur chhawp chhuah dan thianghlim lo leh tawp an sawi tam ber pakhat chu, ‘insuah tawm tura chawhmeh chhawp’ tih te, ‘chawhmeh ei bang paih lovin a belpuiah an chhung lut leh thin’ tih te hi a ni. Hemi chungchangah hian kan thenawm state atanga Mizorama lo zin kan hnampui ngei ngeite pawhin an sawi thin chu, ‘Mizoram chu eitur an chhawp dan a tawp em mai’ tih a ni thin.
Ram tin leh hnam tin hian eitur siam dan leh ei dan kalhmang ‘style’ kan nei vek a. Keini Indian te hi chuan a tlangpuiin kutlawng kan hmang a, hnam thenkhat chuan fian tê, thirkut, chemte etc. an hmang a, kan ei dan style chu kan inzahsak tawn a, kan inthinhrik hran lo. Mahse, ei dan style hrang hrang hmangtute hian inthurualna pakhat kan neih chu, ‘eitur thianghlim lo kan duh lo vek’ tih hi.
Tourism chawikanna kawng kan zawh chho mek a, sabereka khuangkaih ang maia tourist-ten min chim ruih ruih avang hian, chak taka hma kan lak a pawimawh. Tun hnai lawkah tour guide training te pawh neih chhoh a ni leh ta a. Hetiang bawk hian, khualzinte lo hmachhawntu eizawnna group hrang hrangte pawh hi, a bika awareness inpek chhoh zel a pawimawh dawn a. Tuna kan sawi mek, kawnglak hotel leh restaurant-a thawktute pawh thianghlim leh hrisel, mawihnai leh felfai zawka eitur an sawngbawl theihna turin training te pawh hi uluk zawka kalpui duhawm hle.
Tourism hi Mizoram chuan kum 1993 tang daih tawh khan ‘industry’ ah a lo puang tawh a, tourism industry hi state sum hnâr tha ber tura ngaih a ni chungin, hmalakna a chaurau thin hle; budget atangin a chiang. Tun hnaia inkalpawhna a lo that tak avanga tourism lama hmasawnna lo chak ta phut hi sawrkar tan chuan sumhnar tha taka chantirna hun remchang a nih avangin beihpui thlak chur churna tur a ni.
Tourism leh eitur sawngbawl…
