Tun hnaia tourism minister hova tourism officer-te leh Mizoram Synod aiawh ten Mizoram tlawhtu tourist pung zel lo dawnsawn kawngah thawh ho dan tur an rel a. Tourist minister chuan, tourist tam zawkte chu ring lo mi an nih angin, biak in chhung leh a chhehvela awm dan mawi te pawh inzirtir a ngai tih thute sawi in, kohhran tan pawh ring lote hnena rawngbawlna hun tha a inhawn theih thu a sawi a. Synod aiawhte pawhin, khawtlang nuam tak kan neih – hmeichhiate tana him, traffic dan zawm tha etc. te chu “Kristianna vanga kan neih a ni tih tarlan” pawimawh an tih thu an sawi bawk a.
Kohhran hruaitute leh sawrkar aiawhten tourist lo dawnsawn dan tur chungchang an sawi ho ta hial mai hi, tourism lama Mizoram hmasawnna hmel thar lawmawm tak tih loh rual a ni lo. Tunhma te kha chuan, tourist lodge luahlumtu tourist an awm loh avangin tourist lodge hluihlawn deuhthaw te, privatised te a ni nual hman a. Tunah chuan, tourist lodge neihsa te pawh chei hnum that leh a phurawm chho ta hle a. Hetiang zela tourist an pung chho a nih chuan, tourism hian eizawnna peng hrang hrang a rawn siam thar zel ang a, mipui pawhin kan thatpui ang a, Mizoram tourism department pawh hi Mizoram economy-a thawh hlawk ber pawl a ni chho thuai theiin a rinawm.
Tourism minister-in a sawi ang hian, sakhaw lam hotute tan pawh tourism hi rawngbawlna hmanrua peng pawimawh takah a chantir theih a rinawm. Chutih rual erawh chuan, sakhaw lehkhabu nena lo thutchilh nghal ngawt ang kha erawh chu thil tha ber a nih a rinawm loh a. A pawimawh ber zawka chu, sakhaw lehkhabu lo keu khum aiin, kan khawsak phung, kan chet vel dan, kan nungchang hmanga Kristianna thatzia lo lan chhuahtir lam kha a ni zawk awm e. Tuna vlogger tam takin Mizoram nuam an tih chhan an auchhuahpui tam pawl chu, zan rehah pawh hmeichhe tan a him tih te, khawlai an vawng fai tih te, biak an nuam etc. tih te a ni. Khualzinte hian hmun ralmuang, sik leh sa nuam, boruak thianghlim awmna hi an tlawh duh zawng a ni tawh a, chung chu Mizoramah hian a awm kim vek a ni.
Hetih rual hian, taxi fare to lutuk te, eitur sawngbawl dan te, thlenna chungchangah te duhkhawp lohna pawh an auchhuahpui bawk. Min rawn tlawhtuten min fakna ringawt ngaithla lovin, min selnate hi hriat tum ila, insiam tha zel ila, tawngkam ni lo, chetzia-in rawngbawlna thui tak a kalpui theih a ni tih hi kan vawn tel khiau a tha awm e.
Tourism leh rawngbawlna
