Tourism thawktute la dang
Sawrkar hna atanga pension tawh Tourism director atana rawih nawn an duh loh avangin Mizo Zirlai Pawl chuan a ni hnihna atan Thawhlehni khan Tourism directorate-a thawktute pisa kai tur chu an dang a. Sawrkar atanga an thil phut ang an hmu lo a nih chuan, vawiin – Nilaini pawh hian la dan zel an tum.
MZP hian sawrkar hna atanga pension tawh rawih nawn chu an duh loh thu an lo aupui fo tawh leh hma an lo lak tawhna thin a ni tih sawiin, tuna Tourism director charge la tura pension tawh rawih nawn pawh hi dodal an ni tih an sawi a. Amah vek OSD to CM atana ruat chu, dan anga chief minister-in a duh zawng a ruat theih a nih avangin an sawisel tel lo tih an sawi.
Tourism director hi a bang emaw order hi sawrkarin a sut emaw a nih loh chuan vawiin – May 27 pawh hian a hun leh a hmun ngaiah punkhawm leh an rel tih an sawi a. Mipui thlawpna an dawn that avangin an lawm tih an sawi bawk.
Hetihlai hian tuna MZP-in hma a lak mekna, R Lalrodingi chu Commerce & Industries additional director atanga Tourism director atana deputation-a kal tura chief minister-in DP&AR minister hnena ziaka a ngenna leh a kaihhnawih nia lang chu May 26 chawhnu lam khan social media-ah a darh a. DP&AR official lam chuan CM ngenna hi sawrkar hnathawk pension hnai tawh leh deputation-a kal chungchangah, sawrkarin a la tih ngai loh thil a nih thu leh nakin zela sawrkar tana hnuhma tha lo hnutchhiah theihna, chinfel harsa zawnga midangin an la hman theih a nih avangin tih loh zawk atana thu an rawn angin, DP&AR minister hian tih hlawhtlin loh mai nise, tiin ziakin a lo dah tawh a ni.
Hemi chhanletna ni awm social media-a darhah chief minister hian OSD to CM bakah Tourism director atana a awm kawp chu sawrkar tan a tangkai tur zia tarlangin, April 2026 hnulama kum hnih tal heng post pahniha la chhawr chhunzawm theiha hma la turin a lo hriattir tawh a ni.
Tourism thawktute la dang
