Tracking Device & Panic Button
khawl atan subsidy 50% tal ngen
Passenger phur chi lirtheia vuah tur Vehicle Location Tracking Device and Panic Button (VLTD & EAS) chu lirthei neituten lei an harsat deuh nia a lan avangin sawrkar laipui chuan 50% subsidy-a pek dan ngaihtuah sak turin Mizoram Transport minister Vanlalhlana chuan Union minister for Roads Transport & Highways Nitin Gadkari a ngen.
New Delhi-a neih India ram state hrang hrang Transport minister thutkhawm leh 42nd Transport Development Council neihah Mizoram Transport minister Vanlalhlana a tel a. Transport secretary Zosangliana leh director Er R Lalrammawia ten an tawiawm.
Union minister for Roads Transport & Highways kaihhruaia thutkhawmah hian hun then hmasa zawkah sawrkar laipui policy thar, Driver Training Centres (DTC) tlangzarh a ni a. Lirthei fitness endikna tur Automated Testing Station (ATS), lirtheia chetsualna tawkte tan sumfai hmang loa inenkawlna tur – cashless treatment, pilot project-a kalpui mek lirthei vanga chetsualna a awma a mawhphurtu man an nih hmaa an tlanbo thinna – ‘hit and run’ tuartu chhawmdawlna scheme thlirho a ni. Vehicle Scrapping Policy leh Registered Vehicle Scrapping Facility (RVSF) chungchang sawiho a ni bawk.
Union minister hian IIT Madras kutchhuak app pathum – Sanjaya, Madras Matrix leh Field Perception Survey a tlangzarh nghal a ni.
Hun hnihnaah Transport Development Council an thukhawm a. Hetah hian India rama transport association hrang hrangin presentation an pe. Mizoram Transport minister pawhin Union minister hnenah Automated Testing Station pakhat aia tam siam a nih theihna turin hma lak a tul tih a thlen a. Command and Control Centre March 2026 hnulamah hman chhunzawm zelna tura Mizoramin harsatna a neihte a sawi. VLTD & EAS chu lirthei neituten lei an harsat deuh nia a lan avangin 50% subsidy pek dan ngaihtuah sak turin a ngen bawk.
Tracking Device & Panic Button khawl atan subsidy 50% tal ngen
